Read Hiligaynon Psalms 34 Bible Online

Psalms 34 - Hiligaynon bible

Psalms 34

¹Ang Kaayo sang Dios Dayawon ko permi ang Ginoo; indi ako mag-untat sa pagdayaw sa iya.

²Ipabugal ko ang Ginoo, kag kamo nga mga ginapigos magpamati kag magkalipay.

³Mag-upod kamo sa akon sa pagdayaw sa Ginoo; mag-isa kita sa pagdayaw sa iya.

⁴Nagpangamuyo ako sa Ginoo kag ginsabat niya ako. Ginkuha niya ang tanan ko nga kahadlok.

⁵Nagakalipay ang mga nagasalig sa iya, kag indi gid sila mahuy-an.

⁶Nagpanawag ang kubos nga tawo sa Ginoo, kag ginsabat niya siya. Ginluwas niya siya sa tanan niya nga kalisod.

⁷Ang anghel sang Ginoo nagabantay sa mga nagatahod sa Ginoo, kag ginaluwas niya sila sa katalagman.

⁸Tilawi bala ninyo kag hibalua kon daw ano kaayo sang Ginoo. Bulahan ang tawo nga nagapangayo sang proteksyon sa iya.

⁹Tahura ninyo ang Ginoo, kamo nga iya matutom nga katawhan. Kay ang mga nagatahod sa iya indi gid pagkulangon.

¹⁰Ang leon mahimo nga kulangon sang kalan-on kag gutumon, pero ang mga nagadangop sa Ginoo indi gid pagkulangon sang maayo nga mga butang.

¹¹Dali kamo nga mga gusto magtuon sa akon, pamatii ninyo ako. Tudluan ko kamo sa pagtahod sa Ginoo.

¹²Ang bisan sin-o nga luyag sang malawig kag malipayon nga kabuhi

¹³indi siya dapat maghambal sing malain kag indi magbinutig.

¹⁴Dapat likawan niya ang malain kag himuon ang maayo. Tinguhaan niya nga mangin maayo permi ang iya relasyon sa iya isigkatawo.

¹⁵Ginabantayan sang Ginoo ang mga matarong, kag ginapamatian niya ang ila pagpanawag.

¹⁶Pero ginakontra niya ang mga nagahimo sang malain. Laglagon niya sila hasta nga indi na sila madumduman pa sang mga tawo sa kalibutan.

¹⁷Nagapanawag sa iya ang mga matarong, kag ginasabat niya sila. Ginaluwas niya sila sa tanan nila nga kalisod.

¹⁸Malapit ang Ginoo sa mga napaslawan. Ginaluwas niya ang mga nadulaan sang paglaom.

¹⁹Bisan madamo ang mga kalisod sang matarong nga tawo ginaluwas siya sang Ginoo sa sining tanan.

²⁰Ginatipigan gid niya siya; wala gid sing bisan isa ka tul-an nga mabali sa iya.

²¹Ang malaot nga mga buhat sang malaot nga mga tawo amo mismo ang magapatay sa ila. Sila nga mga nagakontra sa mga matarong pagasilutan sang Dios.

²²Luwason sang Ginoo ang iya katawhan nga iya mga alagad. Wala sing bisan isa nga nagadangop sa iya nga pagasilutan niya.