Read Hiligaynon Psalms 35 Bible Online

Psalms 35 - Hiligaynon bible

Psalms 35

¹Pangamuyo para sa Bulig sang Dios Kontraha, Ginoo, ang mga nagakontra sa akon. Awaya ang mga nagaaway sa akon.

²Kuhaa ang imo taming kag sagang, kag buligi ako.

³Ihanda ang imo gamay kag dako nga bangkaw batok sa mga nagalagas sa akon, kag pasaliga ako nga luwason mo ako.

⁴Kabay pa nga ang mga nagatinguha sa pagpatay sa akon mahuy-an. Kabay pa nga ang mga nagaplano sang akon kalaglagan magapalalagyo nga nagasalasala.

⁵Kabay pa nga mangin pareho sila sa upa nga ginapalid sang hangin samtang ginatabog sila sang imo anghel.

⁶Kabay pa nga mangin madulom kag madanlog ang ila alagyan samtang ginalagas sila sang imo anghel.

⁷Bisan wala sing kabangdanan nagbutang sila sang siod sa tago para madakpan ako kag nagkutkot sila sang buho para mahulog ako.

⁸Kabay pa nga makibot sila sa kalaglagan nga magaabot sa ila. Kabay pa nga sila mismo ang masiod sa siod nga ginbutang nila sa tago. Kabay pa nga sila mismo ang mahulog sa buho nga ila ginkutkot.

⁹Dayon magakalipay ako tungod sa pagluwas mo sa akon, Ginoo.

¹⁰Ang kabug-usan sang akon kabuhi magasiling, “Wala gid sing pareho sa imo, Ginoo. Ginaluwas mo ang mga kubos kag mga imol sa mga nagadaogdaog kag nagapamintaha sa ila.”

¹¹Ang mapintas nga mga tawo nagapanaksi batok sa akon. Ginaakusar nila ako sang mga sala nga wala ko mahimo.

¹²Ginabalusan nila ako sang malain sa maayo nga ginahimo ko sa ila, gani nasubuan gid ako.

¹³Pero kon nagamasakit gani sila, nagapangasubo ako paagi sa pagsuksok sang bayo nga sako kag pagpuasa. Kag kon ang akon pangamuyo para sa ila wala ginasabat,

¹⁴nagalakat-lakat ako nga nagapangasubo pareho nga daw nagapangasubo ako para sa akon utod ukon abyan. Nagaduko ako nga nagapangasubo para sa ila pareho sang pagpangasubo sang isa ka tawo sa iya iloy.

¹⁵Pero sang ako na ang nalisdan, nagtipon sila nga nagakalipay. Nagtipon sila nga mga manughalit kontra sa akon. Pero wala ako nakahibalo kon ngaa. Kag wala untat ang ila pagpakalain sa akon.

¹⁶Kaupod sang mga indi diosnon nga mahilig mangyaguta, ginakainitan nila ako.

¹⁷Ginoo, hasta san-o pa bala nga magtulok lang ikaw? Luwasa ako sa ila pagsalakay sa akon nga daw mga leon.

¹⁸Dayon dayawon ko ikaw kag pasalamatan sa pagtililipon sang imo madamo nga katawhan.

¹⁹Indi pagtuguti nga magkalipay ang akon traidor nga mga kaaway sa akon kapierdihan. Indi pagtuguti nga magyaguta sa akon sila nga mga nagadumot sa akon nga wala sing kabangdanan.

²⁰Wala sila nagahambal sang mga pulong nga makapaayo sa iban, kundi nagahimo sila sang sugilanon nga wala sing kamatuoran batok sa mga tawo nga nagapuyo sing malinong sa sini nga lugar.

²¹Nagasinggit sila sa akon, nga nagaakusar, “Hala ka! Nakita namon ang imo ginhimo.”

²²Ginoo, nakita mo ini, gani indi ka magpabaya. Indi ka magpalayo sa akon.

²³Sige na, Ginoo nga akon Dios, depensahi ako sa mga nagaakusar sa akon.

²⁴Pamatud-i, Ginoo nga akon Dios, nga wala ako sing sala suno sa imo pagpakamatarong. Indi pagtuguti nga kadlawan nila ako.

²⁵Indi pagtuguti nga magsiling sila sa ila kaugalingon, “Ti, natuman gid ang amon ginahandom. Nalaglag namon siya!”

²⁶Kabay pa nga ang mga nagakalipay sa akon mga pag-antos mahuy-an kag magasalasala. Kabay pa nga ang tanan nga nagapakanubo sa akon mapaslawan kag mahuy-an.

²⁷Kabay pa nga ang mga nagakalipay sa akon pagkahilway sa mga akusasyon maghinugyaw sa kalipay. Kabay pa nga magsiling sila permi nga, “Dalayawon ang Ginoo nga nagakalipay sa kaayuhan sang iya alagad.”

²⁸Isugid ko ang imo pagkamatarong, kag dayawon ko ikaw permi.