Read Hiligaynon Psalms 38 Bible Online

Psalms 38 - Hiligaynon bible

Psalms 38

¹Pangamuyo sang Tawo nga Nagaantos Ginoo, bisan naakig ka sa akon indi ako pagsabdunga ukon pagsiluti.

²Kay daw sa ginpilas mo ako sang pana kag ginsumbag.

³Indi maayo ang pamatyag sang akon lawas tungod sang imo kaakig sa akon mga sala.

⁴Daw malumos na ako sa akon mga sala, pareho ini sang mabug-at nga palas-anon nga indi ko masarangan.

⁵Tungod sang akon kabuangan, ang akon mga pilas naghubag kag nagbaho.

⁶Nagabarikutot ako sa puwerte nga kasakit, kag nagapangasubo ako sa bilog nga adlaw.

⁷Indi maayo ang pamatyag sang akon lawas kay nagangutngot ang akon balikawang.

⁸Puwerte na gid sa akon kaluya. Nagaugayong ako sa kasakit sang akon balatyagon.

⁹Ginoo, nahibaluan mo ang tanan ko nga ginahandom kag nabatian mo ang akon pag-ugayong.

¹⁰Nagakubakuba ang akon dughan; wala na ako sang kusog, kag malubog na ang akon panulok.

¹¹Ang akon mga abyan kag mga kaupod nagalikaw sa akon tungod sang akon balatian. Bisan ang akon mga paryente nagapalayo sa akon.

¹²Ang mga tawo nga gusto magpatay sa akon nagabutang sang siod agod dakpon ako. Sila nga gusto magsakit sa akon nagaestoryahanay kon paano nila ako malaglag. Sa bilog nga adlaw nagaplano sila sa pagtraidor sa akon.

¹³Nagapabungol-bungol lang ako, nga kuno indi makabati. Nagapaapa-apa lang ako, nga kuno indi makahambal.

¹⁴Ginapabungol-bungulan ko lang ang ila malain nga ginaplano kag wala ako nagasabat,

¹⁵kay nagasalig ako sa imo, Ginoo. Ikaw, Ginoo nga akon Dios, ang magasabat sang akon pangamuyo.

¹⁶Kay nagapangamuyo ako nga indi mo pagtugutan ang akon mga kaaway nga magkalipay ukon magpabugal kon mapukan ako.

¹⁷Daw malaglag na gani ako, kag wala untat ang akon pag-antos.

¹⁸Ginatuad ko ang akon mga sala nga nagapatublag sa akon.

¹⁹Mabakod kag madamo ang akon mga kaaway. Ginakainitan nila ako nga wala sing kabangdanan.

²⁰Ginabalusan nila ako sing malain sa maayo nga ginahimo ko sa ila. Kag ginakontra nila ako kay nagatinguha ako sa paghimo sang maayo.

²¹Ginoo nga akon Dios, indi ako pagpabay-i; indi ka magpalayo sa akon.

²²Buligi ako gilayon, Ginoo nga akon manluluwas.