Read Hiligaynon Psalms 39 Bible Online

Psalms 39 - Hiligaynon bible

Psalms 39

¹Pagtuad sang Sala sang Tawo nga Nagaantos Nagsiling ako sa akon kaugalingon, “Bantayan ko gid ang akon pamatasan, kag likawan ko nga makasala sa akon paghambal. Punggan ko gid ang akon baba nga magreklamo sa Dios samtang ara sa akon tupad ang malaot nga mga tawo.”

²Gani naghipos lang ako, wala gid ako sing may ginhambal. Pero wala ini nakabulig sa akon, kay nagdugang pa gid gani ang kasakit sang akon buot.

³Natublag gid ako katama. Kag sa sagi ko nga hunahuna kon bala mahipos lang ako, nagdugang pa gid gani ang akon pagkatublag. Gani wala ko na mapunggan; nagsiling ako,

⁴“Ginoo, padumduma ako nga may katapusan ang akon kabuhi kag naisip na ang akon mga inadlaw. Padumduma ako nga umalagi lang ang akon kabuhi.”

⁵Kalip-ot sang kabuhi nga ginhatag mo sa akon. Baliwala lang ini sa imo panulok. Sa matuod, ang kabuhi sang tawo daw sa hangin lang nga nagaagi,

⁶ukon pareho lang sang landong nga nagakadula. Masako ang tawo sa mga buluhaton nga wala sing pulos. Nagatipon siya sang manggad, pero indi siya makahibalo kon sin-o ang magapulos sini kon mapatay na siya.

⁷Kag karon, Ginoo, wala na ako sing saligan pa. Ang akon pagsalig ara sa imo.

⁸Hilwaya ako sa tanan ko nga sala, kag indi pagtuguti nga yagutaon ako sang mga buang-buang.

⁹Mahipos na lang ako; indi na lang ako magreklamo, kay ikaw ang nagapaantos sa akon.

¹⁰Karon, indi na ako pagsiluti. Daw sa mapatay na ako sa imo mga pagpaantos sa akon.

¹¹Ginadisiplina mo ang tawo paagi sa pagsaway sa iya, sa iya mga sala. Kag pareho sa sapat-sapat nga nagapang-ut-ot, ginaubos mo ang iya malahalon nga mga pagkabutang. Matuod gid man nga ang kabuhi sang tawo pareho sa hangin nga nagaagi lang.

¹²Sabta ang akon pangamuyo, Ginoo; pamatii ang akon pagpangayo sang bulig. Indi ka magpabungol-bungol sa akon paghibi. Kay isa man lang ako ka dumuluong nga bisita mo diri sa kalibutan, pareho sa tanan ko nga mga katigulangan.

¹³Indi ka na mangakig sa akon, agod magmalipayon man ako sa wala pa ako mapatay.