Read Hiligaynon Psalms 4 Bible Online

Psalms 4 - Hiligaynon bible

Psalms 4

¹Pagsalig sa Dios O Dios nga akon manugpangapin, sabta ako kon magpanawag ako sa imo. Indi bala nga ginbuligan mo ako sa akon mga kalisod? Gani karon, pamatii ang akon mga pangamuyo kag kaluoyi ako.

²Kamo nga mga tawo nga nagakontra sa akon, san-o pa bala kamo mag-untat sa pagpakahuya sang akon dungog? San-o pa bala kamo mag-untat sa paghigugma sa mga butang nga wala sing pulos kag sa pagsunod sa kabutigan?

³Dumduma ninyo nga ginpili sang Ginoo ang mga diosnon nga mangin iya. Amo gani nga pamatian niya ako kon magpanawag ako sa iya.

⁴Kon maakig kamo, indi kamo magpakasala. Kag samtang nagahigda kamo, magpakalinong kamo kag magpamalandong.

⁵Magsalig kamo sa Ginoo kag maghalad sa iya sing husto nga mga halad.

⁶Madamo ang nagasiling, “Ginoo, kabay pa nga mangin bugana ang amon pangabuhi. Ipakita ang imo kaayo sa amon!”

⁷Pero ang kalipay nga ginahatag mo sa akon, mas labaw pa sa kalipay sang mga tawo nga bugana ang ila kalan-on kag ilimnon.

⁸Gani sa akon pagtulog indi ako mahadlok tungod kay ginabantayan mo ako, Ginoo.