Read Hiligaynon Psalms 41 Bible Online

Psalms 41 - Hiligaynon bible

Psalms 41

¹Pangamuyo sang Tawo nga Nagamasakit Bulahan ang tawo nga nagakabalaka sa mga kubos. Buligan siya sang Ginoo sa tion sang kalisod.

²Protektaran siya sang Ginoo kag tipigan ang iya kabuhi. Pakamaayuhon siya sang Ginoo sa duta sang Israel; indi siya pag-itugyan sa iya mga kaaway.

³Buligan siya sang Ginoo sa iya masakit; ayuhon niya siya sa iya ginabatyag.

⁴Nagsiling ako, “Ginoo, kaluoyi ako. Ayuha ako, kay nakasala ako sa imo.”

⁵Nagahambal sing malain ang akon mga kaaway parte sa akon. Siling nila, “San-o pa bala siya mapatay agod malimtan na siya?”

⁶Kon magbisita sila sa akon, nagahambal sila sing mga wala sing pulos; nagatipon sila sang malain nga mga estorya parte sa akon. Kag pagkaguwa nila ginakutsokutso nila ini sa iban.

⁷Ang tanan nga akig sa akon nagahutikay batok sa akon, kag nagahunahuna sila sing malain batok sa akon.

⁸Nagasiling sila, “May malala siya nga balatian, gani indi na gid siya makabangon pa.”

⁹Bisan ang suod ko nga abyan nga ginasaligan ko gid kag nagasalo sa akon sa pagkaon nagtraidor sa akon.

¹⁰Pero ikaw, Ginoo, kaluoyi ako; ayuha ako agod nga makabalos ako sa akon mga kaaway.

¹¹Dayon mahibaluan ko nga nalipay ka sa akon, kay wala makadaog ang akon mga kaaway sa akon.

¹²Tungod kay wala ako sing may ginahimo nga malain, ginatipigan mo ang akon kabuhi sa wala sing katapusan.

¹³Dalayawon ang Ginoo, ang Dios sang Israel, sa wala sing katapusan. Amen! Amen!