Read Hiligaynon Psalms 44 Bible Online

Psalms 44 - Hiligaynon bible

Psalms 44

¹Pangamuyo para sa Pagluwas sang Dios O Dios, nabatian namon ang ginsugid sang amon mga katigulangan parte sa imo mga ginhimo sang ila nga panahon, sang dugay na nga tiyempo,

²nga gintabog mo ang mga katawhan nga wala nagatuo sa imo kag ang amon mga katigulangan amo ang ginpaestar mo sa ila mga lugar. Ginpaantos mo ato nga mga katawhan pero ginpauswag mo ang amon mga katigulangan.

³Pero ang matuod, indi paagi sa armas kag ikasarang sang amon mga katigulangan nga nagmadinalag-on sila kag naangkon nila ang duta, kundi paagi sa imo gahom, ikasarang, kag kaayo, tungod kay ginahigugma mo sila.

⁴Ikaw ang akon Hari kag Dios nga nagadeklarar sang kadalag-an sa amon nga mga kaliwat ni Jacob.

⁵Paagi sa imo mapierdi namon ang amon mga kaaway.

⁶Wala ako nagasalig sa akon pana ukon espada nga makapadaog sa akon.

⁷Kay ikaw ang nagapadaog sa amon batok sa amon mga kaaway. Ginapakahuy-an mo ang mga nagakontra sa amon.

⁸Ipabugal ka namon permi, O Dios, kag dayawon namon sa wala sing katapusan.

⁹Pero karon, ginsikway mo na kami kag ginpakanubo. Wala mo na ginaupdi ang amon mga soldado.

¹⁰Ginpapalagyo mo kami sa amon mga kaaway. Kag ginpanguha nila ang amon mga pagkabutang.

¹¹Gintugot mo nga magkalamatay kami pareho sa mga karnero nga ginpang-ihaw. Kag ginpalapta mo kami sa mga nasyon.

¹²Kami nga imo katawhan ginbaligya mo sing barato. Daw pareho lang nga wala kami sing pulos sa imo.

¹³Ginhimo mo kami nga makahuluya kag kaladlawan sa mga katupad namon nga mga nasyon.

¹⁴May mga hulubaton pa sila nga nagainsulto sa amon, kag nagalungo-lungo sila nga nagayaguta sa amon.

¹⁵Permi lang ako ginapakahuy-an. Kag wala na ako sing nawong nga iatubang,

¹⁶tungod sang mga ginasiling sang mga nagapakahuya kag nagainsulto sa akon, nga amo ang akon mga kaaway nga gusto magbalos sa akon.

¹⁷Natabo ini tanan sa amon bisan pa nga wala kami magkalipat sa imo, ukon maglapas sa imo kasugtanan.

¹⁸Wala kami magtalikod sa imo kag wala kami magsipak sa imo pamaagi.

¹⁹Pero gindugmok mo kami kag ginpabay-an sa madulom gid nga lugar nga sa diin nagaestar ang talunon nga mga ido.

²⁰Kon ginkalimtan ka na namon, O Dios, kag nagapangamuyo kami sa iban nga mga dios,

²¹indi mo ayhan ini mahibaluan, sanglit nahibaluan mo man ang mga sekreto sa hunahuna sang tawo?

²²Pero tungod sa amon pagtuo sa imo, ara kami permi sa katalagman sang kamatayon. Pareho kami sa mga karnero nga ilihawon.

²³Sige na, Ginoo, maghulag ka na! Indi kami pagsikwaya hasta san-o.

²⁴Ngaa nagapanago ka sa amon kag ginakalimtan mo ang amon pag-antos pati na ang pagpamigos sa amon?

²⁵Nagkalatumba kami sa duta kag indi na makabangon.

²⁶Sige na, buligi kami, luwasa kami tungod sang imo gugma sa amon.