Read Hiligaynon Psalms 45 Bible Online

Psalms 45 - Hiligaynon bible

Psalms 45

¹Ang Kasal sang Hari Ang akon hunahuna napun-an sang matahom nga mga pulong samtang ginahambal ko ang akon binalaybay sa hari. Ang akon abilidad sa paghambal pareho sa abilidad sang isa ka maayo nga manunulat.

²Mahal nga Hari, ikaw ang pinakaguwapo sa tanan nga lalaki, kag nagahambal ka sang mga pulong nga makapaayo sa iban, kay ginabendisyunan ka permi sang Dios.

³Itaklos ang imo espada, maisog nga hari; gamhanan ka kag halangdon.

⁴Sa imo pagkahalangdon, magsalakay ka nga madinalag-on para sa kamatuoran kag sa hustisya sang mga ginapigos. Paagi sa imo gahom maghimo ka sang makatilingala nga mga buhat.

⁵Pilasa sang imo matalom nga mga pana ang mga tagipusuon sang imo mga kaaway. Magapasakop ang mga nasyon sa imo.

⁶Ang imo ginharian, O Dios, wala gid sing katapusan, kag matarong ang imo pagdumala sa imo ginharian.

⁷Naluyag ka sa matarong, pero naugot ka sa malain. Gani ginpili ka sang Dios, nga imo Dios, kag ginhatagan sang kalipay nga labaw sang sa ginhatag niya sa imo mga kaupdanan.

⁸Ang imo bayo mahamot sang pahamot nga mira, aloe kag kasia. Ginalipay ka sang huni sang mga instrumento sa imo palasyo nga may malahalon nga dekorasyon.

⁹Ang iban sang imo halangdon nga mga babayi mga anak sang mga hari. Sa imo tuo ara nagatindog ang imo mangin rayna nga nagasuksok sang alahas nga puro gid bulawan halin sa Ofir.

¹⁰Palangasaw-on sang hari, pamatii ang akon isiling: Kalimti ang imo mga kasimanwa kag mga paryente,

¹¹kay nabihag ang hari sa imo katahom. Tahura siya kay agalon mo siya.

¹²Ang mga pumuluyo sang Tyre magadala sang mga regalo sa imo para mangin maayo ka sa ila, pati na ang mga pinakamanggaranon sa ila.

¹³Daw ano katahom sa imo sa sulod sang imo kuwarto. Ang imo bayo may borda nga bulawan.

¹⁴Sa imo matahom nga bayo, dal-on ka sa hari. Kag ang gindala sa imo nga mga dalaga magasunod sa imo bilang abay.

¹⁵Malipayon gid kamo samtang nagasulod kamo sa palasyo sang hari.

¹⁶Mahal nga Hari, ang imo kaliwat nga mga lalaki mangin mga hari man pareho sang ila mga katigulangan. Himuon mo sila nga mga pangulo sa bug-os nga duta.

¹⁷Ipadumdom ko ikaw sa tanan nga henerasyon. Gani dayawon ka sang mga nasyon hasta san-o.