Read Hiligaynon Psalms 46 Bible Online

Psalms 46 - Hiligaynon bible

Psalms 46

¹Kaupod Naton ang Dios Ang Dios amo ang nagaprotektar kag nagahatag sa aton sang kusog. Handa gid siya permi nga magbulig sa tion sang kalisod.

²Gani indi kita magkahadlok bisan pa matay-og ang duta kag magkalatiphag ang mga bukid kag magkalahulog sa kadadalman sang dagat,

³ukon bisan pa ang dagat maghuganas kag maglinagumba ang mga balod, kag tungod sini ang mga bukid mag-uyog.

⁴May suba nga nagahatag sang kalipay sa siyudad sang Dios, ang balaan nga puluy-an sang Labing Mataas nga Dios.

⁵Ang Dios nagapuyo sa sini nga siyudad gani indi ini malaglag. Temprano pa magaabot ang Dios sa pagbulig sa sini nga siyudad.

⁶Nagaginual ang mga nasyon; nagatay-og ang mga ginharian. Sa singgit sang Dios daw matunaw sa kahadlok ang mga tawo sa kalibutan.

⁷Ang Ginoo nga Makagagahom kaupod naton. Ang Dios ni Jacob amo ang aton dalangpan.

⁸Dali, tan-awa ang mga binuhatan sang Ginoo, ang makatilingala nga mga butang nga iya ginahimo sa kalibutan.

⁹Ginapauntat niya ang mga inaway sa bug-os nga kalibutan. Ginapamali niya ang mga pana kag mga bangkaw, kag ginatutdan ang mga taming.

¹⁰Nagasiling siya, “Untata na ninyo ang pag-ilinaway. Kag kilalaha ninyo ako nga Dios. Kamo nga mga nasyon sa bug-os nga kalibutan magadayaw sa akon.”

¹¹Ang Ginoo nga Makagagahom kaupod naton. Ang Dios ni Jacob amo ang aton dalangpan.