Read Hiligaynon Psalms 48 Bible Online

Psalms 48 - Hiligaynon bible

Psalms 48

¹Zion, ang Siyudad sang Dios Gamhanan ang Ginoo nga aton Dios, kag takos gid nga dayawon sa iya siyudad nga ara sa iya balaan nga bukid.

²Matahom ang kataason sini kag nagahatag sang kalipay sa bug-os nga kalibutan. Ining balaan nga Bukid sang Zion amo ang siyudad sang Gamhanan nga Hari.

³Ara ang Dios sa mabakod nga mga parte sang Jerusalem kag napakita na niya sa mga pumuluyo sini nga siya ang ila dalangpan.

⁴Nagtipon ang mga hari sa pagsalakay sa Jerusalem,

⁵pero pagkakita nila sini, natingala gid sila kag nagpalalagyo sa kahadlok.

⁶Nagkurog sila sa kahadlok pareho sa babayi nga nagapasakit.

⁷Ginlaglag sila sang Dios pareho sa mga barko sang Tarshish nga ginwasak sang hangin nga halin sa sidlangan.

⁸Nabatian namon sadto ang mga ginpanghimo sang Dios kag karon nakita namon ini sa siyudad sang amon Dios, ang Ginoo nga Makagagahom. Palig-unon niya ini nga siyudad hasta san-o.

⁹O Dios, nagapamalandong kami sa imo gugma sa sulod sang imo templo.

¹⁰Bantog ikaw kag ginadayaw sang mga tawo sa bug-os nga kalibutan, tungod kay madinalag-on ka paagi sa imo gahom.

¹¹Nagakalipay ang mga pumuluyo sang Zion kag ang mga pumuluyo sang iban nga mga banwa sang Juda, tungod sang imo matarong nga paghukom.

¹²Mga Israelinhon, libuta ninyo ang Zion kag isipa ang mga tore sini.

¹³Tan-awa ninyo sing maayo ang mga pader kag ang mabakod nga mga parte sang sini nga siyudad, agod nga masugiran ninyo ang masunod nga mga henerasyon

¹⁴nga ang Dios nga aton ginaalagad subong amo ang aton Dios sa wala sing katapusan. Siya ang magatuytoy sa aton hasta san-o.