Read Hiligaynon Psalms 49 Bible Online

Psalms 49 - Hiligaynon bible

Psalms 49

¹Ang Kabuangan sang Pagsalig sa Manggad Magpamati kamo, tanan kamo nga mga katawhan nga nagapuyo diri sa kalibutan,

²dungganon man ukon kubos, manggaranon man ukon imol.

³Magahambal ako nga may kaalam kag magahunahuna ako sing mga mapuslanon.

⁴Mamati ako sang mga hulubaton kag isaysay ko ang ila kahulugan samtang ginatukar ko ang arpa.

⁵Wala ako mahadlok kon mag-abot ang katalagman, kon libutan ako sang malaot kag dayaon nga mga tawo

⁶nga nagasalig kag nagapabugal sa ila manggad.

⁷Ang isa ka tawo indi gid makasarang sa pagbayad sa Dios para nga makapabilin siya nga buhi.

⁸Tungod kay puwerte kamahal sang kabuhi; wala gid sing bayad nga makaigo

⁹agod mabuhi ang tawo sa wala sing katapusan kag indi na mapatay.

¹⁰Kay makita sang tanan nga bisan ang mga maalam nagakalamatay, amo man ang mga buang-buang kag mga balingag. Kag kon mapatay na sila ibilin lang nila ang ila manggad sa iban.

¹¹Ang ila lulubngan amo ang ila mangin balay sa wala sing katapusan. Dira sila magaestar hasta san-o bisan nga may ginapanag-iyahan sila nga mga duta.

¹²Bisan nga manggaranon pa ang tawo, mapatay lang siya gihapon pareho sa mga sapat.

¹³Amo ini ang dangatan sang mga tawo nga nagasalig sa ila kaugalingon, kag amo man ang dangatan sang mga nagasunod kag nagapati sa ila ginasiling.

¹⁴Napat-od na nga mapatay sila pareho sa mga karnero. Kag ang kamatayon amo ang magatuytoy sa ila sa lulubngan pareho sa manugbantay nga nagatuytoy sa mga karnero. Sa adlaw sang pagluwas sang Dios, magagahom sa ila ang mga nagakabuhi sing husto. Ang ila mga bangkay magakaladunot. Ang lulubngan amo ang ila mangin elistaran.

¹⁵Pero ako luwason sang Dios sa gahom sang kamatayon, kay kuhaon niya ako.

¹⁶Indi ka magkatublag kon ang iban nagamanggaranon, kon ang manggad sang ila pamilya nagadugang pa gid.

¹⁷Kay indi nila ina madala kon mapatay sila; ang ila manggad indi nila madala sa lulubngan.

¹⁸Bisan pa sa ila nga pagkabuhi ginakabig nila ang ila kaugalingon nga ginpakamaayo sang Dios, kag ginadayaw sila sang mga tawo tungod kay mainuswagon sila,

¹⁹isimpon man sila gihapon sa ila mga katigulangan nga nagkalamatay na, didto sa lugar nga indi nila makita ang kasanag.

²⁰Ang manggaranon nga tawo nga wala sing paghangop sa kamatuoran mapatay pareho sa mga sapat.