Read Hiligaynon Psalms 5 Bible Online

Psalms 5 - Hiligaynon bible

Psalms 5

¹Pangamuyo para sa Proteksyon sang Dios Ginoo, pamatii ang akon pangamuyo nga may pag-ugayong.

²Pamatii ang akon pagpangayo sang bulig sa imo, O Dios nga akon hari, kay sa imo ako nagapangamuyo.

³Sa kaagahon ginapreparar ko ang akon kaugalingon sa pagpangamuyo sa imo. Kag pagkatapos ko pangamuyo nagahulat ako sang imo sabat.

⁴Ikaw ang Dios nga wala malipay sa kalautan; wala mo ginabaton ang malaot nga mga tawo.

⁵Indi makapalapit sa imo presensya ang mga matinaas-taason; ginakaugtan mo ang tanan nga nagahimo sang malain.

⁶Ginalaglag mo ang mga butigon kag ginakangil-aran ang mga nagapamatay sang tawo kag ang mga traidor.

⁷Pero ako iya, makasulod sa imo balaan nga templo tungod sang imo dako nga gugma sa akon. Kag didto simbahon ko ikaw nga may pagtahod.

⁸Ginoo, tungod nga madamo ang akon mga kaaway, tuytuyi ako suno sa imo pagkamatarong, kag himua nga mahapos ang akon pagsunod sa imo pamaagi.

⁹Indi masaligan ang ginasiling sang akon mga kaaway, kay ang ila handom amo ang paglaglag sa iban. Ang ila mga ginahambal indi maagwanta pareho sang bukas nga lulubngan nga mabaho. Ang ila mga ginasugid pulos pangdaya.

¹⁰O Dios, siluti ang akon mga kaaway. Kabay pa nga ang ila malaot nga mga plano amo mismo ang magalaglag sa ila. Sikwaya sila tungod sang ila madamo nga mga sala, kay nagrebelde sila sa imo.

¹¹Pero kabay pa nga magmalipayon ang tanan nga nagapangayo sang proteksyon sa imo. Kabay pa nga magkinanta sila sa kalipay. Protektari sila nga nagahigugma sa imo agod magmalipayon sila tungod sang imo ginhimo para sa ila.

¹²Kay ginapakamaayo mo, Ginoo, ang mga matarong. Ang imo gugma nagaprotektar sa ila pareho sa taming.