Read Hiligaynon Psalms 50 Bible Online

Psalms 50 - Hiligaynon bible

Psalms 50

¹Ang Matuod nga Pagsimba Ang Ginoo, nga makagagahom nga Dios, nagahambal kag nagapanawag sa mga tawo sa bisan diin nga parte sang kalibutan.

²Nagasilak siya halin sa Zion, ang siyudad nga wala gid deperensya ang iya katahom.

³Magaabot ang Dios kag indi siya maghipos lang. Sa una niya may makahalalit nga kalayo kag sa iya palibot may bagyo.

⁴Ginatawag niya ang kalangitan kag ang kalibutan nga magsaksi sa iya nga paghukom sa iya katawhan.

⁵Nagasiling siya, “Patipuna sa akon ang akon matutom nga katawhan nga naghimo sing kasugtanan sa akon paagi sa paghalad.”

⁶Nagapahayag ang kalangitan sang pagkamatarong sang Dios, kay siya ang nagahukom.

⁷Nagasiling pa ang Dios, “Kamo nga akon katawhan, pamatii ninyo ang akon isiling. Ako ang Dios, nga inyo Dios; magasaksi ako batok sa inyo nga mga taga-Israel.

⁸Wala ko kamo ginasaway sa inyo mga paghalad, ukon sa inyo mga halad nga ginasunog nga inyo permi ginahalad.

⁹Pero wala ako nagakinahanglan sang inyo turo nga mga baka kag mga kanding,

¹⁰kay akon ang tanan nga sapat: ang mga sapat sa kagulangan, ang mga baka sa linibo ka mga bukid,

¹¹ang tanan nga pispis sa mga bukid, kag ang mga sapat sa latagon.

¹²Kon gutumon ako indi ko kamo pagpangayuan sang pagkaon, tungod kay akon ang kalibutan kag ang tanan nga ara sa sini.

¹³Nagakaon bala ako sang karne sang turo nga baka ukon nagainom sang dugo sang kanding? Siyempre wala.

¹⁴Ang ihalad ninyo sa akon, nga Labing Mataas nga Dios, amo ang pagpasalamat, kag tumana ninyo ang inyo mga promisa sa akon.

¹⁵Magpanawag kamo sa akon sa tion sang kalisod, kay luwason ko kamo, kag dayawon ninyo ako.”

¹⁶Pero sa mga malaot amo ini ang ginasiling sang Dios, “Wala kamo sang kinamatarong sa pagmitlang sang akon mga sugo kag kasugtanan.

¹⁷Ginakaugtan ninyo ang akon mga pagpanudlo; wala ninyo ginasapak ang akon mga ginahambal.

¹⁸Kon may makita kamo nga makawat nagapakig-abyan kamo sa iya, kag nagapakig-upod man kamo sa mga nagapanginbabayi kag nagapanginlalaki.

¹⁹Nagahambal kamo sing malain kag maabtik kamo maghambal sing binutig.

²⁰Ginapakalain ninyo permi ang inyo mga utod.

²¹Sang ginhimo ninyo ini nga mga butang, naghipos lang ako, kag naghunahuna kamo nga pareho lang ako sa inyo. Pero sabdungon ko kamo kag ipakita ko sa inyo kon daw ano kamo kalaot.

²²Pamatii ninyo ini, kamo nga nalipat sa Dios, kay kon indi, laglagon ko kamo nga wala sing may makaluwas sa inyo:

²³Ang nagahalad sa akon sing pagpasalamat nagapadungog sa akon, kag ang nagabantay sang iya pagginawi luwason ko.”