Read Hiligaynon Psalms 51 Bible Online

Psalms 51 - Hiligaynon bible

Psalms 51

¹Pangayo Patawad sa Dios Kaluoyi ako, O Dios, suno sa imo gugma. Panasa ang akon mga sala suno sa imo dako nga pagkabalaka sa akon.

²Hugasi ako sa akon kalautan; tinlui ako sa akon mga sala.

³Kay sa tanan nga tion ginahunahuna kag ginaako ko ang akon mga sala.

⁴Sa imo lang gid ako nakasala. Ginhimo ko ang mga butang nga ginakabig mo nga malaot. Gani husto ikaw sa imo mga ginhambal batok sa akon. Wala ka nagsala sa imo paghukom sa akon.

⁵Malaot ako kag nakasala halin pa sang akon pagkatawo.

⁶Ang matinud-anon nga tagipusuon amo ang imo luyag; tudlui ako nga mangin maalamon.

⁷Tinlui ako sa akon mga sala agod mangin matinlo ako. Hugasi ako agod mangin maputi gid ako.

⁸Pabatia ako sang kinalipay kag kinasadya; bisan pa ginadugmok mo ang akon mga tul-an kabay pa nga malipay ako liwat.

⁹Kuhaa ang akon mga sala; panasa ang tanan ko nga kalautan.

¹⁰Himua nga matinlo ang akon tagipusuon, O Dios, kag hatagi liwat ako sing matutom nga espiritu.

¹¹Indi ako pagtabuga sa imo presensya, kag indi pagkuhaa ang imo balaan nga Espiritu sa akon.

¹²Ibalik sa akon ang kalipay nga nabatyagan ko sang ginluwas mo ako, kag hatagi ako sing matinumanon nga espiritu.

¹³Dayon tudluan ko ang mga makasasala sang imo mga pamaagi agod magbalik sila sa imo.

¹⁴Luwasa ako sa akon sala nga amo ang pagpatay, O Dios nga akon manluluwas, kag isugid ko sing mabaskog ang imo nga pagluwas.

¹⁵Ginoo, buligi ako nga maghambal sang mga pagdayaw sa imo, kag dayawon ko ikaw.

¹⁶Wala ka naluyag sa mga halad. Bisan maghalad ako sa imo sang halad nga ginasunog, indi ka malipay.

¹⁷Ang halad nga makapalipay sa imo, O Dios, amo ang kabuhi nga nagapaubos kag nagahinulsol sa iya mga sala. Ini nga klase sang halad indi mo pag-isikway.

¹⁸O Dios, pakamaayuha ang Zion, ang siyudad sang Jerusalem, kay malipay ka nga himuon ina. Patinduga liwat ang mga pader sini.

¹⁹Dayon magakalipay ka sa husto nga mga halad, lakip na ang mga halad nga ginasunog sing bug-os. Kag igahalad ang turo nga mga baka sa imo halaran.