Read Hiligaynon Psalms 52 Bible Online

Psalms 52 - Hiligaynon bible

Psalms 52

¹Ang Paghukom kag ang Kaluoy sang Dios Kamo nga mga gamhanan nga mga tawo, ngaa nga ginapabugal ninyo ang inyo kalautan? Indi bala nga ang Dios maayo permi sa inyo?

²Nagaplano kamo sa paglaglag sa iban. Ang inyo dila pareho sa matalom nga labaha. Ang pagpangdaya amo ang inyo ginahimo.

³Ginahigugma ninyo ang malain imbes ang maayo, kag ang kabutigan imbes ang kamatuoran.

⁴Kamo nga mga dayaon, luyag ninyo nga pasakitan ang iban paagi sa inyo mga pulong.

⁵Sigurado nga laglagon kamo sang Dios sa wala sing katapusan. Dakpon niya kamo kag guyuron paguwa sa inyo mga balay. Kag bawion niya ang inyo kabuhi.

⁶Makita ini sang mga matarong kag matingala sila. Kadlawan nila kamo kag magasiling sila,

⁷“Tan-awa ninyo ang mga tawo nga wala nagasalig sa Dios bilang ila mabakod nga dalangpan. Sa baylo nagasalig sila sa ila madamo nga manggad kag naggamhanan pa gid sila paagi sa pagpanglaglag sa iban.”

⁸Pero ako iya pareho sa kahoy nga olibo nga nagatubo sa templo sang Dios. Nagasalig ako sa iya gugma sa wala sing katapusan.

⁹O Dios, pasalamatan ko ikaw hasta san-o tungod sang imo ginhimo. Magasalig ako sa imo kay maayo ka sa imo matutom nga katawhan.