Read Hiligaynon Psalms 55 Bible Online

Psalms 55 - Hiligaynon bible

Psalms 55

¹Pangamuyo sang Tawo nga Ginluiban sang Iya Abyan Pamatii ang akon pangamuyo, O Dios; talupangda ang akon pagpangayo sang bulig.

²Pamatii kag sabta ako. Natublag ako sa akon mga palaligban.

³Nabalaka na ako sa mga pagpamahog kag pagpamigos sang akon malaot nga mga kaaway. Kay ginagamo nila ako kag ginadumtan sa ila kaakig.

⁴Puwerte ang kubakuba sang akon dughan. Ginakulbaan ako nga basi mapatay ako.

⁵Nagakurog ako sa kahadlok, sa puwerte gid nga kahadlok.

⁶Kon may pakpak lang kuntani ako pareho sa pating, malupad ako kag mangita sing palahuwayan.

⁷Malupad ako pakadto sa malayo nga kamingawan kag didto magapuyo.

⁸Magadali-dali ako sa pagpangita sang akon palanaguan agod magpanago sa kaakig sang akon mga kaaway nga daw sa mabaskog nga hangin ukon bagyo.

⁹Ginoo, laglaga ang akon mga kaaway; himua nga indi sila mag-intiendihanay. Kay nakita ko ang pagpamintas kag pag-ilinaway sa siyudad.

¹⁰Adlaw-gab-i nagakatabo ini bisan diin sa siyudad. Puno sang kalaot kag kagamo ang siyudad.

¹¹Ang pagpanglaglag bisan diin lang; kag wala untat ang pagpamigos kag pagpangdaya sa mga karsada.

¹²Kon ang kaaway ko ang nagainsulto sa akon mabatas ko ini. Kon ang kontra ko ang nagapakanubo sa akon malikawan ko siya.

¹³Pero ang akon mismo kapareho, kaupod, kag suod nga abyan ang nagainsulto sa akon.

¹⁴Malapit kami anay sa isa kag isa, kag nagakadto kami sa templo sang Dios kaupod sang madamo nga mga tawo.

¹⁵Kabay pa nga gulpi lang mapatay ang akon mga kaaway. Kabay pa nga lamunon sila nga buhi sang lulubngan. Kay ang kalautan ara sa ila kag sa ila mga puluy-an.

¹⁶Pero ako iya nagapangayo sang bulig sa Ginoong Dios kag ginaluwas niya ako.

¹⁷Aga, udto, kag gab-i nagareklamo ako kag nagaugayong, kag ginapamatian niya ako.

¹⁸Luwason niya ako nga indi ako maano sa akon pagpakig-away, bisan madamo ang nagakontra sa akon.

¹⁹Ang Dios nga nagahari sa wala sing katapusan magapamati sa akon kag paubuson niya ang akon mga kaaway. Ini sila wala sing pagbag-o kag wala nagatahod sa Dios.

²⁰Ang akon abyan sadto nagkontra sa iya mga abyan; wala niya gintuman ang iya mga ginpromisa.

²¹Malulo kag manami siya maghambal, pero may pagdumot sa iya tagipusuon, kag ang iya mga ginahambal makapilas gali pareho sa matalom nga espada.

²²Itugyan sa Ginoo ang imo mga palaligban, kay atipanon niya ikaw. Indi niya pagpabay-an ang mga matarong hasta san-o.

²³Pero ang mga manugpatay kag mga dayaon ihaboy niya sa lugar sang mga patay, sa wala pa magtunga-tunga ang ila kabuhi. Pero ako iya, magasalig sa Dios.