Read Hiligaynon Psalms 57 Bible Online

Psalms 57 - Hiligaynon bible

Psalms 57

¹Pangamuyo para sa Bulig sang Dios O Dios, kaluoyi ako kay sa imo ako nagapangayo sang proteksyon pareho sa mga buto sang pispis nga nagapanago sa idalom sang mga pakpak sang ila iloy. Magapangayo ako sang proteksyon sa imo hasta nga matapos ang mga katalagman.

²Nagapanawag ako sa imo, Labing Mataas nga Dios, sa imo nga nagatuman sang imo katuyuan sa akon.

³Halin sa langit, magapadala ka sang bulig sa pagluwas sa akon. Pakahuy-an mo ang mga nagasalakay sa akon. Ipakita mo ang imo gugma kag katutom sa akon.

⁴Ginalibutan ako sang mga kaaway nga pareho sa mga leon nga handa sa pagtukob. Ang ila mga ngipon amo ang mga bangkaw kag mga pana. Ang ila mga dila amo ang matalom nga mga espada.

⁵Ipakita, O Dios, ang imo pagkagamhanan sa kalangitan kag sa bug-os nga kalibutan.

⁶Natublag ako kay nagbutang ang akon mga kaaway sang siod sa akon mga alagyan. Nagkutkot man sila sang buho sa akon alagyan, pero sila man mismo ang nahulog sa sadto nga buho.

⁷O Dios, nagasalig gid ako sa imo. Kantahan ko ikaw sang mga pagdayaw.

⁸Magabugtaw ako samtang nagapamanagbanag, kag ihanda ko ang akon kaugalingon kag ang akon instrumento nga may mga kuwerdas sa pagdayaw sa imo.

⁹Ginoo, dayawon ko ikaw sa tunga sang mga katawhan. Kantahan ko ikaw sa tunga sang mga taga-iban nga nasyon.

¹⁰Kay ang imo gugma kag katutom indi gid matakos; mas mataas pa ini sa kalangitan.

¹¹Ipakita, O Dios, ang imo pagkagamhanan sa kalangitan kag sa bug-os nga kalibutan .