Read Hiligaynon Psalms 58 Bible Online

Psalms 58 - Hiligaynon bible

Psalms 58

¹Malaglag ang mga Malaot Kamo nga mga pangulo, matarong bala ang inyo paghukom sa mga tawo?

²Indi! Kay ang inyo lang ginahunahuna amo ang paghimo sang malain. Nagapanghalit kamo sa inyo lugar.

³Ang mga malaot nagapalayo sa Dios kag nagabutig halin pa sang ila pagkatawo.

⁴Dalitan sila pareho sa mga man-og. Pareho sila sa kobra nga indi magpamati sa tingog sang hanas nga manug-anta.

⁶Ginoong Dios, kuhaa ang ila ikasarang sa pagpanghalit nga daw sa nagabingaw ka sang mga ngipon sang mga leon.

⁷Madula kuntani sila pareho sa tubig nga nagakahubas, kag kon magpana sila, indi kuntani sila makaigo.

⁸Mangin pareho kuntani sila sa taklong nga daw sa nagakatunaw ang iya lawas samtang nagakamang, ukon pareho sa bata nga natawo nga patay, nga wala nakakita sang kasanag.

⁹Laglaga sila, bata man ukon tigulang. Laglaga sila nga mas madasig pa sa pag-init sang kolon nga ginadabukan sang mga kahoy-kahoy.

¹⁰Malipay ang mga matarong kon makita nila nga ginabalusan mo ang mga malaot kag magkalamatay sila.

¹¹Dayon magasiling ang mga tawo, “Matuod gid man nga may padya para sa mga matarong kag may Dios nga nagahukom sa mga tawo sa kalibutan.”