Read Hiligaynon Psalms 59 Bible Online

Psalms 59 - Hiligaynon bible

Psalms 59

¹Pangamuyo Para sa Bulig sang Dios Batok sa mga Malaot O Dios, luwasa ako sa akon mga kaaway; protektari ako sa mga nagakontra sa akon.

²Luwasa ako sa malaot nga mga tawo nga manugpatay.

³Ginoo, tan-awa kon paano sila nagahulat sa pagpatay sa akon bisan wala ako nakasala sa ila.

⁴Wala ako sing may nahimo nga sala, pero handa sila sa pagsalakay sa akon. Sige na, Ginoong Dios nga Makagagahom, Dios sang Israel, talupangda ako kag buligi. Siluti na ang mga katawhan nga wala nagatuo sa imo. Indi pagkaluoyi ang malaot nga mga traidor.

⁶Nagabalik sila kon gab-i nga nagangurob pareho sa ido samtang nagalibot sa siyudad.

⁷Pamatii ang ila ginapanghambal; makasakit ini pareho sa espada. Nagasiling pa sila, “Wala sing may makabati sa amon.”

⁸Pero ginakadlawan mo lang sila, Ginoo, ginasuyaan mo sila tanan nga wala nagatuo sa imo.

⁹O Dios, ikaw ang akon kusog; magahulat ako sa imo kay ikaw ang akon dalangpan,

¹⁰kag ikaw ang Dios nga nagahigugma sa akon. Pangunahan mo ako kag ipakita mo sa akon ang pagkapierdi sang akon mga kaaway.

¹¹Pero indi sila pagpatya gulpi agod indi malipatan sang akon katawhan kon paano mo ginasilutan ang imo mga kaaway. Ginoo nga amon manugprotektar, patalanga kag laglaga ang akon mga kaaway paagi sa imo gahom.

¹²Nagapakasala sila sa ila ginahambal, gani kabay pa nga masiod sila sa ila pagkabugalon. Nagapakamalaot sila kag nagabinutig,

¹³gani sa imo kaakig, laglaga sila hasta nga magakaladula sila. Dayon mahibaluan sang bug-os nga kalibutan, nga ikaw, O Dios, nagahari sa Israel.

¹⁴Nagabalik ang akon kaaway kon gab-i nga nagangurob pareho sa ido samtang nagalibot sa siyudad.

¹⁵Pareho sila sang ido nga nagalibot-libot sa pagpangita sang pagkaon, kag nagataghol kon indi mabusog.

¹⁶Pero ako iya magakanta parte sa imo kusog. Kada aga magakanta ako sing mabaskog parte sa imo gugma. Tungod kay ikaw ang akon dalangpan, ang nagaprotektar sa akon sa tion sang kalisod.

¹⁷O Dios, ikaw ang akon kusog; magakanta ako sang mga pagdayaw sa imo kay ikaw ang akon dalangpan, ang Dios nga nagahigugma sa akon.