Read Hiligaynon Psalms 60 Bible Online

Psalms 60 - Hiligaynon bible

Psalms 60

¹Pangamuyo para sa Bulig sang Dios O Dios, ginsikway mo kami kag ginpapierdi. Naakig ka sa amon, pero karon talupangda kami.

²Gintay-og mo kag ginpalitik ang duta sang Israel, pero karon nagapangabay ako sa imo nga kay-uhon mo ini kay daw marumpag na ini.

³Ginapaantos mo sing puwerte gid kami nga imo katawhan. Nagadalang-dalang kami; daw pareho lang nga ginhubog mo kami sang bino.

⁴Pero ginapaandaman mo man kami nga nagatahod sa imo agod makalikaw kami sa mga pana sang kaaway.

⁵Luwasa kami paagi sa imo gahom. Sabta ang amon mga pangamuyo agod maluwas kami nga imo mga hinigugma.

⁶O Dios, nagsiling ka didto sa imo templo, “Magadaog ako; bahinon ko ang Shekem kag ang Kapatagan sang Sucot kag ipanagtag sa akon katawhan.

⁷Akon ang Gilead subong man ang Manase. Ang Efraim amo ang akon manugdepensa, kag ang Juda amo ang akon manugdumala.

⁸Ang Moab akon suluguon kag ang Edom akon ginapanag-iyahan. Nagasinggit ako sang kadalag-an batok sa Filistia.”

⁹Sin-o ang magadala sa akon sa Edom kag sa siyudad sini nga napalibutan sang mga pader?

¹⁰Indi bala ikaw, O Dios, nga nagsikway sa amon kag wala na nagaupod sa amon mga soldado?

¹¹Buligi kami batok sa amon mga kaaway, kay wala sing pulos ang bulig sang tawo.

¹²Magadaog kami paagi sa imo bulig, O Dios, kay pierdihon mo ang amon mga kaaway.