Read Hiligaynon Psalms 62 Bible Online

Psalms 62 - Hiligaynon bible

Psalms 62

¹Magsalig sa Proteksyon sang Dios Sa Dios lang ako may kapahuwayan; ang akon kaluwasan nagahalin sa iya.

²Siya lang ang akon palalipdan nga bato kag manluluwas. Siya ang akon dalangpan, gani indi gid ako matublag.

³Kamo tanan nga akon mga kaaway, hasta san-o pa bala ang inyo pagsalakay sa akon agod laglagon ako? Pareho ako sa pader nga daw marumpag ukon sa kudal nga nagahilay.

⁴Gusto lang ninyo nga pahalinon ako sa akon mataas nga posisyon. Nagakalipay kamo sa pagbinutig. Nagahambal kamo sing maayo sa akon pero sa sulod sang inyo tagipusuon ginapakamalaot ninyo ako.

⁵Sa Dios lang ako makaangkon sang kapahuwayan kay ginahatagan niya ako sang paglaom.

⁶Siya lang ang akon palalipdan nga bato kag manluluwas. Siya ang akon dalangpan, gani indi ako matublag.

⁷Ara sa Dios ang akon kaluwasan kag kadungganan. Siya ang akon mabakod nga palalipdan nga bato, ang akon manugprotektar.

⁸Kamo nga mga katawhan sang Dios, magsalig kamo sa iya sa tanan nga tion! Isugid sa iya ang tanan ninyo nga palaligban kay siya ang nagaprotektar sa aton.

⁹Ang mga tawo, dungganon man ukon kubos, indi masaligan. Palareho lang sila nga wala sing pulos; mamag-an pa sila sa hangin.

¹⁰Indi kamo magsalig sa pagpanguwarta. Indi kamo maglaom nga may makuha kamo paagi sa pagpangawat. Bisan magdugang pa ang inyo manggad, indi ini pagsaligi.

¹¹Indi lang kaisa nga nabatian ko nga nagsiling ang Dios nga sa iya ang gahom

¹²kag ang gugma. Sigurado nga magabalos ang Ginoo sa mga tawo suno sa ila mga binuhatan.