Read Hiligaynon Psalms 63 Bible Online

Psalms 63 - Hiligaynon bible

Psalms 63

¹Paghandom sa Dios O Dios, ikaw ang akon Dios kag aga pa ako nagadangop sa imo. Nauhaw ang akon bug-os nga kabuhi sa imo. Daw ara ako sa mamala nga duta nga wala sing tubig.

²Nakita ko gid ang imo pagkagamhanan kag pagkahalangdon sa imo templo.

³Dayawon ko ikaw tungod kay ang imo gugma mas bilidhon pa sang sa kabuhi.

⁴Pasalamatan ko ikaw samtang nagakabuhi ako. Bayawon ko ang akon mga kamot sa pagpangamuyo sa imo.

⁵Mangin kontento ako pareho sa tawo nga busog gid sa punsyon. Kag magadayaw ako sa imo nga nagahugyaw sa kalipay.

⁶Samtang nagahigda ako ginadumdom ko ikaw. Sa bilog nga gab-i nagapamalandong ako sa imo,

⁷kay ikaw ang nagabulig sa akon. Magahugyaw ako sa kalipay samtang ginaprotektaran mo ako pareho sang pagprotektar sang pispis sa iya mga buto sa idalom sang iya mga pakpak.

⁸Nagapalapit ako sa imo, kag ginauyatan mo ako agod indi ako maano.

⁹Ang nagatinguha sa pagpatay sa akon magakadto sa lugar sang mga patay.

¹⁰Magakalamatay sila sa inaway, kag ang ila mga bangkay kaunon sang talunon nga mga ido.

¹¹Magakalipay ang hari tungod sa ginhimo sang Dios sa iya. Magakalipay man ang tanan nga nagapromisa sa ngalan sang Dios. Pero pahipuson sang Dios ang mga baba sang mga butigon.