Read Hiligaynon Psalms 66 Bible Online

Psalms 66 - Hiligaynon bible

Psalms 66

¹Pagdayaw kag Pagpasalamat Kamo nga mga katawhan sa bug-os nga kalibutan, maghinugyaw kamo sa Dios sa kalipay.

²Magkanta kamo sang mga pagdayaw sa iya. Padunggi ninyo siya paagi sa inyo mga pagdayaw.

³Hambali ninyo siya, “O Dios, daw ano ka makatilingala ang imo mga binuhatan. Tungod sa imo dako nga gahom, ang imo mga kaaway nagaluhod sa imo sa kahadlok.

⁴Ang tanan nga katawhan sa bug-os nga kalibutan magasimba sa imo. Magakanta sila sang mga pagdayaw sa imo.”

⁵Dali kamo, kag tan-awa ninyo ang makatilingala nga mga ginhimo sang Dios sa mga tawo.

⁶Ginpamala niya ang dagat; kag gintabok sang aton mga katigulangan ang suba nga nagalakat lang. Sa sadtong ginhimo sang Dios magkalipay kita.

⁷Nagahari siya sa wala sing katapusan paagi sa iya gahom, kag ginapanilagan niya ang mga nasyon. Dapat ang mga nagarebelde sa Dios indi magpabugal sang ila kaugalingon.

⁸Mga katawhan, dayawa ninyo ang Dios! Ipabati ang inyo pagdayaw sa iya.

⁹Ginatipigan niya ang aton kabuhi; kag wala siya magtugot nga malaglag kita.

¹⁰Sa pagkamatuod, gintilawan mo kami, O Dios; gintinluan mo kami pareho sa pilak nga ginpapuraw sa kalayo.

¹¹Ginpasiod mo kami kag ginpapas-an sang mabug-at nga mga karga.

¹²Ginpatapakan mo kami sa amon mga kaaway; daw sa nag-antos kami sa kalayo ukon baha. Pero karon ginbutang mo kami sa maayo nga kahimtangan.

¹³Magahalad ako sa imo templo sang mga halad nga ginasunog. Tumanon ko ang akon mga promisa sa imo

¹⁴nga ginsiling ko sang ara ako sa kalisod.

¹⁵Magahalad ako sa imo sang matambok nga mga sapat bilang halad nga ginasunog, pareho sang karnero, turo nga baka, kag kanding.

¹⁶Dali kamo kag pamati, tanan kamo nga nagatahod sa Dios, kay sugiran ko kamo kon ano ang iya ginhimo sa akon.

¹⁷Nagpangayo ako sang bulig sa iya kag gindayaw ko siya.

¹⁸Kon ginpabay-an ko lang ang akon mga sala wala kuntani nagpamati ang Ginoo sa akon.

¹⁹Pero nagpamati gid ang Dios sa akon; ginpamatian niya ang akon pangamuyo.

²⁰Dalayawon ang Dios, kay wala niya pagsikwaya ang akon pangamuyo, kag ginahigugma gid niya ako.