Read Hiligaynon Psalms 68 Bible Online

Psalms 68 - Hiligaynon bible

Psalms 68

¹Kanta parte sa Kadalag-an Sige na, O Dios, laptaha ang imo mga kaaway. Kabay pa nga magpalagyo sila.

²Tabuga sila pareho sa aso nga ginapalid sang hangin. Laglaga sila nga mga malaot sa imo presensya, pareho sa kandila nga nagakatunaw sa kalayo.

³Pero ang mga matarong magahinugyaw sa kalipay sa imo presensya.

⁴Kantahi ninyo ang Dios, kantahi ninyo siya sang mga pagdayaw. Dayawa ninyo siya nga nagasakay sa panganod. Ang iya ngalan amo ang Ginoo; magkalipay kamo sa iya presensya.

⁵Ang Dios, nga nagapuyo sa iya balaan nga templo, nagaatipan sa mga ilo kag nagaprotektar sa mga balo nga babayi.

⁶Ginahatagan niya sang pamilya ang mga nagaisahanon kag ginahilway niya sing malipayon ang mga ginbihag. Pero ang mga rebelde magaestar sa mamala kag mainit nga duta.

⁷O Dios, sang ginpangunahan mo ang imo katawhan sa pagpanglakaton sa kamingawan,

⁸nagtay-og ang duta kag nag-ulan tungod nga nag-abot ka, O Dios sang Israel, ikaw nga nagpahayag sa Sinai.

⁹Nagpadala ka sang bugana nga ulan kag naulanan ang mamala nga duta nga ginhatag mo sa imo katawhan.

¹⁰Dira sila nag-estar, kag sa imo kaayo ginhatagan mo ang mga imol sang ila mga kinahanglanon.

¹¹Nagpadala ka, Ginoo, sang mensahi, kag ginpamalita ini sang madamo nga mga babayi:

¹²“Nagpalalagyo ang mga hari kag ang ila mga soldado, kag ang ila mga pagkabutang ginpartida sang mga babayi sang Israel.

¹³Bisan ang mga nagpabilin sa toril sang mga karnero ginpartihan sang mga imahen sang pating nga ang mga pakpak nahaklapan sang pilak kag ang punta sang pakpak nahaklapan sang puro nga bulawan.”

¹⁴Sang ginpalapta sang Dios nga Makagagahom ang mga hari, daw sa mga yelo ini nga nagtupa sa Bukid sang Zalmon.

¹⁵Pagkatahom sang bukid sang Bashan, madamo ini sang mga bungtod.

¹⁶Ngaa nahisa ini sa bukid nga ginpili sang Dios nga iya pagapuy-an hasta san-o?

¹⁷Nag-abot ang Ginoo sa iya templo halin sa Sinai kaupod ang iya linibo ka mga karwahe.

¹⁸Pagsaka niya sa mataas nga lugar madamo nga mga bihag ang iya gindala kag nagbaton siya sang mga regalo halin sa mga tawo, bisan sa rebelde nga mga tawo. Kag didto magapuyo ang Ginoong Dios.

¹⁹Dalayawon ang Ginoo, ang Dios nga aton manluluwas, kay adlaw-adlaw ginabuligan niya kita sa aton mga problema.

²⁰Ang aton Dios, Dios nga nagaluwas. Siya ang Ginoong Dios nga nagaluwas sa aton sa kamatayon.

²¹Sigurado gid nga dugmukon sang Dios ang ulo sang iya mga kaaway nga nagapadayon sa pagpakasala.

²²Nagsiling ang Ginoo, “Pabalikon ko ang akon mga kaaway halin sa Bashan; pabalikon ko sila halin sa kadadalman sang dagat,

²³agod pamatyon sila kag tasak-tasakon ninyo ang ila dugo kag ang inyo mga ido makapaayaw sa pagdilap sang ila dugo.”

²⁴O Dios kag Hari ko, nakita sang tanan ang imo parada sang pagdaog pakadto sa imo templo.

²⁵Ara sa una ang mga manugkanta kag sa ulihi ang mga musikero; sa tunga nila amo ang mga dalaga nga nagapatunog sang ila mga tamborin.

²⁶Nagasinggit sila, “Dayawa ninyo ang Dios sa inyo mga pagtililipon! Dayawa ninyo ang Ginoo, kamo nga mga kaliwat ni Israel!”

²⁷Nagauna ang gamay nga tribo ni Benjamin, sunod amo ang mga pangulo sang Juda upod sang ila grupo, kag sunod amo ang mga pangulo sang Zebulun kag Naftali.

²⁸O Dios, ipakita ang imo gahom pareho sang ginhimo mo sang una sa amon.

²⁹Tungod sang imo templo sa Jerusalem magadala ang mga hari sang mga regalo sa imo.

³⁰Sabdunga inang nasyon nga pareho sa mabangis nga sapat sa mga bugang. Sabdunga man ang mga katawhan nga pareho sa turo nga mga baka nga kaupod sang mga tinday hasta nga magsurender sila kag maghalad sang ila mga pilak sa imo. Laptaha ang mga katawhan nga nalipay sa inaway.

³¹Magapasakop ang mga taga-Egipto sa imo. Ang mga taga-Etiopia magadali-dali hatag sang ila mga regalo sa imo.

³²Magkanta kamo sa Dios, kamo nga mga pumuluyo sang mga ginharian sa kalibutan. Magkanta kamo sang pagdayaw sa Ginoo

³³nga nagasakay sa kalangitan nga ara na sadto pa. Pamatii ninyo ang iya nagadaguob nga tingog.

³⁴Ibantala ninyo ang pagkagamhanan sang Dios nga nagahari sa Israel. Ang kalangitan nagapakita sang iya pagkagamhanan.

³⁵Makatilingala ang Dios sang Israel samtang nagapaguwa siya sa iya balaan nga puluy-an. Ginahatagan niya sang gahom kag kusog ang iya katawhan. Dalayawon ang Dios !