Read Hiligaynon Psalms 7 Bible Online

Psalms 7 - Hiligaynon bible

Psalms 7

¹Husto Permi ang Ginahimo sang Dios Ginoo nga akon Dios, sa imo ako nagapangayo sang proteksyon. Luwasa ako sa mga nagasalakay sa akon,

²kay kon indi, basi patyon nila ako pareho sang paggus-ab sang leon sa iya biktima, kag wala sing may makaluwas sa akon.

³Ginoo nga akon Dios, kon nakahimo gid man ako sing malain sa akon isigkatawo,

⁴ukon ginbalusan ko sing malain ang maayo nga ginhimo sang akon abyan, ukon gin-agawan ko sang mga pagkabutang ang akon mga kaaway nga wala man lang sing kabangdanan,

⁵pabay-i nga salakayon ako sang akon mga kaaway kag pierdihon. Pabay-i nga tapak-tapakon nila ako hasta nga mapatay, kag bayaan ang akon bangkay sa duta.

⁶Sige na, Ginoo nga akon Dios, ipakita ang imo kaakig sa akon mga kaaway nga naugot gid sa akon, kay hustisya man ang ginapangita mo.

⁷Tipuna sa imo palibot ang tanan nga katawhan, kag dumalahan mo sila halin sa langit.

⁸Ikaw, Ginoo, ang nagahukom sa mga katawhan. Pamatud-i nga wala ako sing sala, kay nakahibalo ka man nga matarong ako kag wala ako sing may ginhimo nga malain.

⁹Tapnaa ang kalautan nga ginahimo sang malaot nga mga tawo, kag pakamaayuha ang mga matarong, kay matarong ka nga Dios, kag ginausisa mo ang amon mga hunahuna kag tagipusuon.

¹⁰Ikaw, O Dios, ang nagaprotektar sa akon. Ginaluwas mo ang mga nagakabuhi sing husto.

¹¹Matarong ka nga manughukom, kag adlaw-adlaw akig ka sa mga malaot.

¹²Kon indi sila maghinulsol sa ila mga sala handa ka nga magsilot sa ila. Daw pareho ka sa soldado nga handa na ang iya makamamatay nga mga armas. Nabaid na niya ang iya espada kag ginabinat na niya ang pana nga may nagadabdab nga baslay.

¹⁴Ang malain nga mga tawo nagahunahuna sing malain kag kagamo, amo gani nga nagapangdaya sila.

¹⁵Ang pagpanggamo kag pagpamintas nga ila ginahimo nagabalik sa ila. Pareho lang nga nagakutkot sila sang buho para mahulog ang iban, pero sila mismo ang mahulog.

¹⁷Pasalamatan ko ikaw Ginoo, tungod sang imo pagkamatarong. Kantahan ko ikaw sang mga pagdayaw, Labing Mataas nga Dios.