Read Hiligaynon Psalms 71 Bible Online

Psalms 71 - Hiligaynon bible

Psalms 71

¹Isugid ang mga Ginhimo sang Dios Hasta San-o Ginoo, sa imo ako nagapangayo sang proteksyon. Indi pag-itugot nga mahuy-an ako.

²Buligi ako kag luwasa tungod kay matarong ka. Pamatii ako kag luwasa.

³Protektari ako pareho sa palalipdan nga bato; sa imo ako permi magadangop. Ginbuot mo nga maluwas ako, kay ikaw ang akon palalipdan nga bato kag mabakod nga palanaguan.

⁴O Dios ko, luwasa ako sa kamot sang malaot kag mapintas nga mga tawo.

⁵Kay ikaw ang akon paglaom, O Ginoong Dios. Halin sang bata pa ako, nagasalig na ako sa imo.

⁶Halin sang akon pagkatawo nagasalig ako sa imo kag ginaprotektaran mo ako. Dayawon ko ikaw sa wala sing katapusan.

⁷Nangin halimbawa ang akon kabuhi sa madamo, tungod kay ikaw ang akon malig-on nga manugprotektar.

⁸Dayawon ko permi ang imo pagkagamhanan.

⁹Indi ako pagsikwaya kon tigulang na ako. Indi ako pagpabay-i kon maluya na ako.

¹⁰Kay ang akon mga kaaway nagatipon kag nagaestoryahanay parte sa akon; gusto nila ako nga patyon.

¹¹Nagasiling sila, “Ginpabay-an na siya sang Dios, gani lagson ta siya kag dakpon kay wala sing may magbulig sa iya.”

¹²O Dios ko, indi ka magpalayo sa akon; buligi ako gilayon.

¹³Kabay pa nga ang mga nagaakusar sa akon mahuy-an kag malaglag. Kabay pa nga ang gusto maghalit sa akon, mahuy-an kag yagutaon.

¹⁴Pero ako iya, O Dios, magalaom permi sa imo, kag dugangan ko pa gid ang pagdayaw sa imo.

¹⁵Isugid ko permi ang imo matarong nga ginahimo nga amo ang pagluwas sa imo katawhan, bisan indi ko ini matungkad.

¹⁶Magakadto ako sa imo templo, Ginoong Dios, kag magdayaw sa imo tungod sang imo gamhanan nga mga ginhimo. Ibantala ko ang imo lamang pagkamatarong.

¹⁷O Dios, halin sang bata pa ako, gintudluan mo na ako parte sang imo makatilingala nga mga binuhatan, kag hasta subong ginasugid ko ini.

¹⁸Kag bisan tigulang na ako kag ubanon, indi ako pagpabay-i, O Dios, samtang ginabantala ko ang imo gahom kag kusog sa masunod nga henerasyon.

¹⁹Ang imo pagkamatarong, O Dios, indi matungkad. Makatilingala ang imo mga ginhimo; wala gid sing may pareho sa imo.

²⁰Bisan ginapaeksperiensya mo ako sang madamo nga mga pag-antos, hatagan mo ako liwat sang bag-o nga kabuhi; daw pareho ako sa patay nga buhion mo liwat.

²¹Himuon mo ako nga labi pa ka dungganon, kag lipayon mo ako liwat.

²²O Dios ko, tungod sang imo katutom dayawon ko ikaw paagi sa pagtukar sang arpa. Kantahan ko ikaw sang mga pagdayaw nga ginatukaran sang arpa, O Balaan nga Dios sang Israel.

²³Magahugyaw ako sa kalipay samtang nagakanta ako sang mga pagdayaw sa imo tungod kay ginluwas mo ako.

²⁴Isugid ko permi ang imo pagkamatarong, kay ang mga gusto maghalit sa akon nahuy-an kag nagsalasala.