Read Hiligaynon Psalms 73 Bible Online

Psalms 73 - Hiligaynon bible

Psalms 73

¹Ang Matarong nga Paghukom sang Dios Maayo gid ang Dios sa Israel, labi na gid sa mga matinlo ang tagipusuon.

²Pero ako, diutayan lang madulaan sang pagtuo,

³kay nahisa ako sa bugalon kag malaot nga mga tawo sang makita ko nga nagauswag sila.

⁴Maayo ang ila lawas kag indi masakit ang ila kamatayon.

⁵Wala sila nagaantos kag wala sila sing mga kalisod pareho sa iban nga mga tawo.

⁶Gani ginapakita-kita nila ang ila pagkabugalon kag pagpamintas.

⁷Ang ila mga tagipusuon puno sang kalautan, kag ang ila lang permi nga ginahunahuna amo ang paghimo sang malain.

⁸Ginayaguta nila kag ginahambalan sang malain ang iban. Sa ila nga pagkabugalon nagapamahog sila sa pagpamigos sa iban.

⁹Nagahambal sila sang malain sa Dios sa langit kag sa mga tawo sa kalibutan.

¹⁰Bisan ang katawhan sang Dios nagasunod sa ila, kag nagabaton lang sa ila ginahambal.

¹¹Nagasiling sila, “Paano makahibalo ang Dios? Wala sing inalung-ong ang Labing Mataas nga Dios.”

¹²Amo ina ang mga malaot, wala sing palaligban kag nagamanggaranon pa gid.

¹³Gani wala bala sing pulos ang pagkabuhi ko nga matinlo kag wala sing sala?

¹⁴Kay permi mo ako ginapaantos, O Dios; halos kada aga ginasilutan mo ako.

¹⁵Kon ginyaguta ko man ikaw pareho sang ginhambal sang mga malaot, mahimo nga ginluiban ko ang imo katawhan.

¹⁶Karon gintinguhaan ko gid nga intiendihon ini nga mga butang pero binudlayan ako,

¹⁷hasta nga nagkadto ako sa imo templo, kag dayon naintiendihan ko kon ano ang matabo sa mga malaot.

¹⁸Matuod gid man nga ginabutang mo sila sa indi sigurado nga kahimtangan, kag laglagon mo sila.

¹⁹Gulpi lang sila nga malaglag; magakalamatay sila tanan sa ila makahaladlok nga dangatan.

²⁰Pareho sila sa damgo nga pagkaaga wala na. Indi na sila madumduman pa kon silutan mo na sila.

²¹Sang naglain sadto ang akon buot kag nasakitan ang akon balatyagon,

²²nangin pareho ako sa sapat sa imo panulok nga balingag kag wala nakaintiendi.

²³Pero sa gihapon nagapalapit ako sa imo kag ginatuytuyan mo ako.

²⁴Ginatuytuyan mo ako paagi sa imo mga paglaygay, kag sa ulihi dal-on mo ako sa maayo gid nga kahimtangan.

²⁵Wala na sing iban pa sa langit nga akon ginakinahanglan kundi ikaw lang. Tungod kay ikaw ari sa akon, wala na ako sing iban pa nga ginahandom sa kalibutan.

²⁶Bisan magluya ang akon lawas kag hunahuna, ikaw, O Dios, amo ang akon kusog. Ikaw lang gid ang akon ginakinahanglan hasta san-o.

²⁷Sigurado gid nga magakawala ang mga tawo nga nagapalayo sa imo; laglagon mo sila nga indi matutom sa imo.

²⁸Pero ako iya, kabigon ko nga maayo ang pagpalapit sa imo, O Dios. Ikaw Ginoong Dios ang ginhimo ko nga akon manugprotektar, agod masugid ko ang tanan mo nga binuhatan.