Read Hiligaynon Psalms 74 Bible Online

Psalms 74 - Hiligaynon bible

Psalms 74

¹Pangamuyo para sa Nasyon sa Tion sang Kalisod O Dios, ngaa bala nga padayon mo kami nga ginasikway? Ngaa akig ka sa katawhan nga imo ginabantayan?

²O Dios, dumduma ang imo katawhan nga ginpili mo sang una nga mangin imo kag ginluwas mo agod imo panag-iyahan. Dumduma ang Bukid sang Zion nga sa diin nagapuyo ka.

³Kadtui bala kag tan-awa ang padayon nga pagkaguba sang templo tungod sang ginhimo sang mga kaaway.

⁴Naghinugyaw ang imo mga kaaway sa imo templo sa pagpakita nga nagdaog sila batok sa imo katawhan. Nagbutang sila dira sang tanda sang ila pagdaog.

⁵Sa ila pagguba sa templo daw pareho sila sa mga tawo nga nagapang-utod sang mga kahoy sa kakahuyan paagi sa ila mga wasay.

⁶Ginwasak nila ang ginkortehan nga mga kahoy sang templo paagi sa ila mga wasay kag mga piko.

⁷Ginsunog nila ang imo templo; ginhigkuan nila ining imo ginapuy-an.

⁸Nagsiling sila sa ila kaugalingon nga laglagon nila kami sing bug-os. Ginsunog nila ang tanan nga ginatipunan sa pagsimba sa imo diri sa duta sang Israel.

⁹Nadula na ang tanda sang imo presensya sa amon; wala na sing propeta nga nabilin, kag wala sing may nakahibalo sa amon kon hasta san-o pa matapos ining nagakalatabo sa amon.

¹⁰O Dios, hasta san-o pa bala ang pagpakahuya sang amon mga kaaway sa imo? Yagutaon ka na lang bala nila sa wala sing katapusan?

¹¹Ngaa wala mo pa sila pagsiluti? Pareho lang nga gintago mo ang imo kamot. Laglaga na sila!

¹²Ikaw, O Dios, ang amon hari halin pa sang una, kag madamo nga beses nga ginluwas mo ang mga tawo sa kalibutan.

¹³Ikaw ang nagtunga sang dagat paagi sa imo gahom, kag ikaw ang nagdunot sang mga ulo sang dalagko nga mga sapat sa dagat.

¹⁴Ikaw ang nagdugmok sang mga ulo sang dragon nga Leviatan kag nagpakaon sang iya bangkay sa mga sapat nga nagaestar sa kamingawan.

¹⁵Ikaw ang nagpatubod sang mga tuburan kag mga ililigan sang tubig. Ikaw ang nagpahubas sa mga suba nga wala nagakahubsan.

¹⁶Ikaw ang naghimo sang adlaw kag sang gab-i, kag ikaw ang nagpahamtang sang adlaw kag sang bulan sa ila nahamtangan.

¹⁷Ikaw ang nagbutang sang tanan nga dulunan sa kalibutan, kag ikaw ang naghimo sang tig-ilinit kag sang tigtulugnaw.

¹⁸Dumduma, Ginoo, kon paano ka ginpakahuy-an kag ginyaguta sang buang-buang nga mga kaaway.

¹⁹Ang imo katawhan nga daw pareho sa pating indi pag-itugyan sa ila mga kaaway nga daw pareho sa mabangis nga sapat. Indi pagkalimti hasta san-o ang imo katawhan nga ginapigos.

²⁰Dumduma ang imo kasugtanan sa amon, kay madamo na nga pagpamintas ang ginahimo sa madulom nga mga lugar sa sini nga duta.

²¹Indi pag-itugot nga mahuy-an ang mga ginapigos. Kabay pa nga dayawon ka sang mga kubos kag mga imol.

²²Sige na, O Dios, depensahi ang imo dungog. Dumduma kon paano ka ginapakahuy-an permi sang mga buang-buang.

²³Indi pagpabay-i ang wala sing untat nga singgit sang imo mga kaaway sa pagpakita sang ila kaakig.