Read Hiligaynon Psalms 77 Bible Online

Psalms 77 - Hiligaynon bible

Psalms 77

¹Kalipay sa Tion sang Kalisod Nagapanawag ako sing mabaskog sa Dios. Nagapanawag ako sa iya agod mabatian niya ako.

²Sa tion sang kalisod nagapangamuyo ako sa Ginoo. Kag kon gab-i ginabayaw ko ang akon mga kamot sa pagpangamuyo, kag wala ako ginakapoy, pero wala gihapon ako sang kalipay.

³Kon magpamalandong ako sa Dios nagapanghayhay ako kag nagakadulaan sang paglaom.

⁴Wala niya ako ginapatulog; indi ako kahibalo kon ano ang akon ihambal, tungod nga natublag ako.

⁵Ginahunahuna ko ang mga inadlaw nga nagliligad kag ang madugay na nga mga tinuig.

⁶Ginadumdom ko ang mga tinion nga nagakanta ako sa kagab-ihon. Nagapamalandong ako kag amo ini ang ginapamangkot ko sa akon kaugalingon:

⁷“Isikway na lang bala ako sang Ginoo hasta san-o? Indi na gid bala siya malipay sa akon?

⁸Nadula na gid bala ang iya gugma sa akon? Indi na gid bala niya pagtumanon ang iya promisa?

⁹Nalimtan na bala niya ang pagkaluoy? Wala na bala siya sing kaluoy tungod sang iya kaakig?”

¹⁰Dayon nagsiling ako, “Ang nalainan sang akon buot amo nga ang Labing Mataas nga Dios wala na nagabulig.”

¹¹Ginoo, dumdumon ko ang imo mga binuhatan. Huo, dumdumon ko ang mga milagro nga ginpanghimo mo sang una.

¹²Hunahunaon ko kag pamalandungan ang tanan mo nga gamhanan nga mga binuhatan.

¹³O Dios, ang imo pamaagi lain sang sa iban. Wala na sing pareho sa imo kagamhanan.

¹⁴Ikaw ang Dios nga nagahimo sang mga milagro. Ginapakita mo ang imo gahom sa mga katawhan.

¹⁵Paagi sa imo gahom ginluwas mo ang imo katawhan nga mga kaliwat ni Jacob kag ni Jose.

¹⁶Sadto nga hitabo ang mga tubig, O Dios, daw pareho sa tawo nga sang pagkakita sa imo hinadlukan kag nagkulurog.

¹⁷Nag-ulan halin sa mga panganod; nagdaguob sa langit kag nagpangilat sa bisan diin.

¹⁸Mabatian ang daguob sa mga bagyo; ang mga kilat nagpasanag sa kalibutan; kag nagtay-og ang kalibutan.

¹⁹Gintabok mo ang dagat nga may dalagko nga mga balod, pero indi ka makita.

²⁰Paagi kay Moises kag kay Aaron gintuytuyan mo ang imo katawhan nga pareho sa mga karnero.