Read Hiligaynon Psalms 78 Bible Online

Psalms 78 - Hiligaynon bible

Psalms 78

¹Pagtuytoy sang Dios sa Iya Katawhan Mga kasimanwa, pamatii ninyo ang akon mga pagpanudlo.

²Tudluan ko kamo paagi sa mga paanggid. Sugiran ko kamo sang tinago nga mga kamatuoran sang una

³nga nahibaluan na naton, kay ginsugid ini sa aton sang aton mga katigulangan.

⁴Indi naton ini pagtaguon sa aton mga kabataan; isugid naton ini sa masunod nga mga henerasyon. Sugiran ta sila sang gahom sang Ginoo kag sang iya dalayawon kag makatilingala nga mga binuhatan.

⁵Ginhatagan niya sang kasuguan ang katawhan sang Israel nga mga kaliwat ni Jacob. Ginmanduan niya ang aton mga katigulangan nga itudlo ini sa ila mga kabataan,

⁶agod ang masunod nga henerasyon makahibalo man sini, kag matudlo man nila ini sa ila mga kabataan.

⁷Sa sini nga paagi magasalig sila sa Dios kag indi nila pagkalimtan ang iya mga ginhimo kundi tumanon nila ang iya mga sugo.

⁸Indi sila mangin pareho sa ila mga katigulangan nga mga matig-a sing ulo, indi matinumanon, indi malig-on ang ila pagsalig sa Dios, kag indi matutom sa iya.

⁹Ang mga soldado sang Efraim, bisan may armas sila nga mga pana, nagpalalagyo sang tion sang inaway.

¹⁰Wala nila gintuman ang ila kasugtanan sa Dios; wala nila ginsunod ang iya kasuguan.

¹¹Ginkalimtan nila ang iya makatilingala nga mga binuhatan nga ginpakita sa ila.

¹²Naghimo ang Dios sang milagro didto sa Zoan, sa duta sang Egipto kag nakita ini sang aton mga katigulangan.

¹³Gintunga niya ang dagat kag ginpaagi sila; ginhimo niya ang tubig nga daw mga pader.

¹⁴Kon adlaw, ginatuytuyan niya sila paagi sa panganod, kag kon gab-i, paagi sa kasanag sang kalayo.

¹⁵Ginpalitik niya ang mga bato sa kamingawan kag nagtubod ang tubig kag ginpaayawan niya sila inom sang tubig nga daw halin sa kadadalman sang duta.

¹⁶Ginpatubod niya ang tubig sa bato kag nag-ilig ang tubig nga daw sa suba.

¹⁷Pero ang aton mga katigulangan nagpadayon sa pagpakasala sa iya. Didto sa kamingawan nagrebelde sila sa Labing Mataas nga Dios.

¹⁸Gintilawan nila sing hungod ang Dios paagi sa pagpangayo sang kalan-on nga gusto gid nila.

¹⁹Gin-insulto nila ang Dios paagi sa pagsiling, “Makapapunsyon bala ang Dios diri sa kamingawan?

²⁰Matuod nga ginpahampak niya ang bato kag nagsagawak ang tubig, pero makahatag bala siya sang tinapay kag karne sa aton nga iya katawhan?”

²¹Gani naakig ang Ginoo sang mabatian niya sila. Sa iya kaakig sa ila nga mga Israelinhon, nga mga kaliwat ni Jacob, ginsalakay niya sila sang kalayo.

²²Kay wala sila sing pagtuo sa iya, kag wala sila magsalig nga luwason niya sila.

²³Pero bisan pa sina, ginmanduan niya ang langit nga mag-abri,

²⁴kag ginpaulanan niya sila sang pagkaon nga ginatawag manna. Ginhatag niya sa ila ini nga pagkaon nga halin sa langit agod ila kaunon.

²⁵Sila nga tawo nagkaon sang pagkaon sang mga anghel, kag ginpagustuhan gid sila sang Dios sini.

²⁶Ginpahuyop niya ang hangin nga halin sa sidlangan kag sa bagatnan paagi sa iya gahom.

²⁷Kag ginpaulanan niya sila sang mga pispis nga daw pareho kadamo sa balas sa baybayon.

²⁸Ginpahugpa niya ini sa palibot sang ila mga tolda didto sa ila nga kampo.

²⁹Gani nagkaon sila kag nagkalabusog, kay ginhatag sang Dios sa ila ang gusto nila.

³⁰Pero samtang nagapagusto sila sang kaon,

³¹naakig ang Dios sa ila. Ginpamatay niya ang makusog nga mga pamatan-on sang Israel.

³²Bisan pa sining tanan nga ginpanghimo niya, nagpadayon sila sa pagpakasala. Bisan naghimo siya sang mga milagro, wala sila nagtuo sa iya.

³³Gani gulpi lang niya gintapos ang ila kabuhi paagi sa hinali nga kalaglagan.

³⁴Sang ginpatay niya ang iban sa ila, ang nabilin nagdangop sa iya kag naghinulsol, nga nagahandom gid sa iya.

³⁵Nadumduman nila nga ang Labing Mataas nga Dios amo ang ila palalipdan nga bato kag manunubos.

³⁶Pero nagadayaw-dayaw lang sila sa iya. Mga butigon sila.

³⁷Indi sila mainunungon sa iya; indi sila matutom sa ila kasugtanan sa iya.

³⁸Pero bisan pa sini, maluluy-on gihapon ang Dios sa ila. Ginpatawad niya ang ila mga sala kag wala niya sila paglaglaga. Sa madamo nga tion ginpunggan niya ang iya kaakig bisan puwerte na gid ang iya kaugot.

³⁹Gindumdom niya nga sila mga tawo lang, nga pareho sa nagalabay nga hangin nga nagakadula lang.

⁴⁰Pila ka beses sila nga nagrebelde sa Dios kag nagpasubo sa iya didto sa kamingawan.

⁴¹Liwat-liwat nila nga gintilawan ang Dios; ginpaakig gid nila ang Balaan nga Dios sang Israel.

⁴²Ginkalimtan nila ang iya gahom nga ginpakita sadtong tion nga ginluwas niya sila sa ila mga kaaway

⁴³kag sang tion nga ginhimo niya ang iya mga milagro kag makatilingala nga mga binuhatan didto sa Zoan, sa duta sang Egipto.

⁴⁴Ginhimo niya nga dugo ang mga suba sang mga Egiptohanon, kag tungod sini indi sila makainom.

⁴⁵Nagpadala siya sang panong sang mga langaw sa pagpaantos sa ila, kag sang mga paka sa paghalit sang ila mga duta.

⁴⁶Ginpakaon niya sa mga apan ang ila mga tanom kag mga patubas.

⁴⁷Ginpamatay niya ang ila mga ubas kag mga kahoy nga sikomoro paagi sa ulan nga yelo.

⁴⁸Ginpamatay niya ang ila mga kasapatan paagi man sa ulan nga yelo kag sa kilat.

⁴⁹Tungod sa iya puwerte gid nga kaakig sa ila, ginpadal-an niya sila sang mga anghel sa paglaglag sa ila.

⁵⁰Wala niya pagpunggi ang iya kaakig; wala niya sila pagluwasa sa kamatayon, kundi ginpamatay niya sila paagi sa mga kalalat-an.

⁵¹Ginpamatay niya ang tanan nga kamagulangan nga lalaki sa Egipto, nga amo ang lugar sang mga kaliwat ni Ham.

⁵²Dayon ginpaguwa niya sa Egipto ang iya katawhan nga pareho sa mga karnero kag gintuytuyan niya sila sa kamingawan.

⁵³Gin-ubayan niya sila, gani wala sila mahadlok. Pero ang ila mga kaaway nagkalalumos sa dagat.

⁵⁴Gindala niya sila sa duta nga iya ginpili, didto sa bukid nga gin-agaw niya paagi sa iya gahom.

⁵⁵Gintabog niya ang mga pumuluyo didto palayo sa iya katawhan, kag ginbahin-bahin niya ang duta sa mga tribo sang Israel agod ila panag-iyahan, kag didto niya sila ginpaestar.

⁵⁶Pero gintilawan nila ang Labing Mataas nga Dios kag nagrebelde sila sa iya. Wala nila gintuman ang iya mga sugo.

⁵⁷Nagpalayo sila kag nagluib sa Dios pareho sang ila mga katigulangan. Indi sila masaligan pareho sa guba nga pana.

⁵⁸Ginpaimon kag ginpaakig nila ang Dios tungod sang ila mga dios-dios sa mga simbahan sa mataas nga mga lugar.

⁵⁹Nahibaluan sang Dios ining ginhimo sang mga Israelinhon, gani naakig siya kag ginsikway niya sila sing bug-os.

⁶⁰Ginbayaan niya ang iya tolda sa Shilo nga iya ginpuy-an diri sa kalibutan.

⁶¹Gintugutan niya nga agawon sang kaaway ang Kahon sang Kasugtanan nga simbolo sang iya pagkagamhanan kag pagkahalangdon.

⁶²Naakig siya sa katawhan nga iya ginapanag-iyahan, gani ginpapatay niya sila sa inaway.

⁶³Ginsunog ang ila bataon nga mga lalaki, gani nawad-an sang palamanahon ang ila mga dalaga.

⁶⁴Nagkalamatay sa inaway ang ila mga pari, kag ang ila mga balo nga babayi wala makapangasubo para sa ila.

⁶⁵Dayon daw sa nakamata ang Ginoo; pareho siya sa isa ka makusog nga tawo nga ginpaisog sang bino.

⁶⁶Ginpatal-as niya ang iya mga kaaway; ginpakahuy-an niya sila sa wala sing katapusan.

⁶⁷Wala niya pagpilia ang tribo ni Efraim nga mga kaliwat ni Jose.

⁶⁸Sa baylo, ginpili niya ang tribo ni Juda kag ang Bukid sang Zion nga iya ginapakamahal.

⁶⁹Didto ginpatindog niya ang iya templo nga malig-on hasta san-o, pareho sang langit kag sang duta.

⁷⁰Ginpili sang Dios si David nga mangin iya alagad. Ginkuha niya siya sa iya trabaho nga manugbantay sang karnero kag ginhimo nga hari sang Israel, ang katawhan nga iya ginapanag-iyahan. Pareho si David sa isa ka manugbantay sang mga karnero,

⁷¹

⁷²gin-atipan niya ang mga Israelinhon sing sinsero kag gindumalahan niya sila sing maayo.