Read Hiligaynon Psalms 80 Bible Online

Psalms 80 - Hiligaynon bible

Psalms 80

¹Pangamuyo para sa Bulig sang Dios sa Nasyon Pamatii kami, O Manugbantay sang Israel, nga manugtuytoy sang mga kaliwat ni Jose nga pareho sa mga karnero. Ikaw nga nagapungko sa imo trono sa ibabaw sang mga kerubin, ipakita ang imo gahom

²sa tribo ni Efraim, ni Benjamin, kag ni Manase. Ipakita na ang imo gahom, kag kadtui kami kag luwasa.

³O Dios, ibalik sa amon ang amon maayo nga kahimtangan. Ipakita sa amon ang imo kaayo agod maluwas kami.

⁴Ginoong Dios nga Makagagahom, hasta san-o pa bala ang imo kaakig sa mga pangamuyo namon nga imo katawhan?

⁵Ginpuno mo kami sang kasubo, kag halos mainom na namon ang amon mga luha.

⁶Gintugot mo nga awayon kami sang amon katupad nga mga nasyon, kag sila nga amon mga kaaway nagayaguta sa amon.

⁷O Dios nga Makagagahom, ibalik sa amon ang amon maayo nga kahimtangan. Ipakita sa amon ang imo kaayo agod maluwas kami.

⁸Kami nga imo katawhan daw pareho sa tanom nga ubas nga ginkuha mo sa Egipto kag gintanom sa duta nga ang mga katawhan sini gintabog mo.

⁹Ginhawanan mo ini nga duta, kag nagpanggamot sing maayo ang ubas kag nagpangalapkap ini sa bug-os nga duta.

¹⁰Ginhandungan sang iya mga sanga ang mga bukid kag ang dalagko nga mga kahoy nga sedro.

¹¹Naglambot ang iya mga sanga hasta sa Dagat sang Mediteraneo kag hasta sa Suba sang Eufrates.

¹²Pero ngaa gin-guba mo, O Dios, ang mga pader sang sini nga ubas? Gani ginakawat sang tanan nga nagaagi ang mga bunga sini.

¹³Kag ginakaon ini sang mga talunon nga baboy kag sang iban pa nga talunon nga mga sapat.

¹⁴Balikda kami, O Dios nga Makagagahom! Halin sa langit, tan-awa kami sing maayo. Dumduma kami nga imo katawhan nga

¹⁵pareho sa tanom nga ubas nga gintanom mo paagi sa imo gahom. Dumduma kami nga imo mga anak nga imo ginpalig-on para sa imo kadayawan.

¹⁶O Dios, daw sa gintapas kami nga ubas kag ginsunog. Gintulok mo kami nga may kaakig kag ginlaglag mo kami.

¹⁷Pero karon buligi kami nga katawhan nga imo ginpili nga mangin malapit sa imo kag ginpalig-on para sa imo kadayawan,

¹⁸kag indi na kami magbiya sa imo. Ibalik sa amon ang amon maayo nga kahimtangan, kag simbahon ka namon.

¹⁹Ginoong Dios nga Makagagahom, ibalik sa amon ang maayo nga kahimtangan! Ipakita sa amon ang imo kaayo agod maluwas kami.