Read Hiligaynon Psalms 86 Bible Online

Psalms 86 - Hiligaynon bible

Psalms 86

¹Pangamuyo para sa Bulig sang Dios Ginoo, pamatii kag sabta ang akon pangamuyo kay kubos kag imol ako.

²Tipigi ang akon kabuhi kay matutom ako sa imo. Ikaw ang akon Dios; luwasa ako nga imo alagad nga nagasalig sa imo.

³Kaluoyi ako, Ginoo, kay permi ako nagapanawag sa imo.

⁴Lipaya ako, Ginoo, nga imo alagad kay sa imo ako nagapangamuyo.

⁵Matuod nga maayo ka kag mapinatawaron, kag puno ka sang paghigugma sa tanan nga nagapanawag sa imo.

⁶Pamatii ang akon pangamuyo, Ginoo; pamatii ang akon pagpakitluoy sa imo.

⁷Nagapanawag ako sa imo sa tion sang kalisod kay ginasabat mo ako.

⁸Wala sing dios nga pareho sa imo, Ginoo; wala sing bisan sin-o nga makahimo sang imo mga ginpanghimo.

⁹Ang tanan nga nasyon nga imo ginhimo magasimba sa imo. Pagadayawon ka nila.

¹⁰Kay gamhanan ka, kag makatilingala ang imo mga binuhatan; kag ikaw lang ang Dios.

¹¹Ginoo, tudlui ako sang imo pamaagi, kag tumanon ko ini nga may katutom sa imo. Himua ako nga matinud-anon sa akon pagtahod sa imo.

¹²Ginoo nga akon Dios, dayawon ko ikaw sa bug-os ko nga tagipusuon. Dayawon ko ikaw sa wala sing katapusan.

¹³Kay dako ang imo gugma sa akon; ginluwas mo ako sa kamatayon.

¹⁴O Dios, ginasalakay ako sang grupo sang bugalon nga mga tawo agod patyon. Mga mapintas sila kag wala nagakilala sa imo.

¹⁵Pero ikaw, Ginoo, mabinalak-on kag maluluy-on nga Dios. Mahigugmaon ka kag matutom, kag indi dali maakig.

¹⁶Talupangda ako kag kaluoyi; hatagi ako sang imo kusog kag luwasa ako nga imo alagad.

¹⁷Hatagi ako sang tanda sang imo kaayo agod makita ini sang akon mga kaaway kag mahuy-an sila. Kay ikaw, Ginoo, ang nagabulig kag nagalipay sa akon.