Read Hiligaynon Psalms 89 Bible Online

Psalms 89 - Hiligaynon bible

Psalms 89

¹Ang Kasugtanan sang Dios kay David Ginoo, kantahon ko permi ang imo dako nga gugma. Isugid ko ang imo katutom hasta san-o.

²Ipahibalo ko gid nga malig-on ang imo gugma sa wala sing katapusan, kag magapadayon pareho sang langit.

³Nagsiling ka, “Naghimo ako sang kasugtanan sa akon alagad nga si David, nga akon ginpili nga mangin hari. Kag amo ini ang akon ginpromisa sa iya:

⁴Ang tagsa ka hari sang Israel magahalin sa imo mga kaliwat hasta san-o; ang imo ginharian magapadayon sa wala sing katapusan.”

⁵Ginoo, ang mga langitnon nga tinuga nagadayaw sa imo makatilingala nga mga binuhatan kag sa imo katutom.

⁶Wala sing bisan isa sa langit nga pareho sa imo, Ginoo. Wala sing langitnon nga tinuga nga makapareho sa imo.

⁷Ginatahod ka sa pagtililipon sang langitnon nga mga tinuga. Sila tanan nga nagapalibot sa imo may kahadlok gid sa imo.

⁸Ginoong Dios nga Makagagahom, wala sing bisan sin-o nga pareho sa imo; gamhanan ka kag matutom sa tanan mo nga ginahimo.

⁹Ginagamhan mo ang mabalod nga dagat; ginapalinaw mo ang iya dalagko nga mga balod.

¹⁰Gindugmok mo ang dako nga sapat nga si Rahab kag napatay ini. Paagi sa imo gahom ginpalapta mo ang imo mga kaaway.

¹¹Imo ang langit kag ang kalibutan; gintuga mo ang kalibutan kag ang tanan nga ara sa sini.

¹²Ginhimo mo ang aminhan kag ang bagatnan. Ang Bukid sang Tabor kag ang Bukid sang Hermon daw sa mga tawo nga nagakanta sa imo sa kalipay.

¹³Gamhanan ka gid! Puwerte ikaw kakusog!

¹⁴Nagahari ka nga may pagkamatarong kag hustisya, nga ginapangunahan sang gugma kag katutom.

¹⁵Ginoo, bulahan ang mga tawo nga nakaeksperiensya sang paghinugyaw sa imo sa kalipay, nga nagakabuhi sa kaayo sang imo presensya.

¹⁶Tungod sa imo nagakalipay sila permi, kag ginadayaw nila ang imo pagkamatarong.

¹⁷Ikaw ang ginapabugal namon nga amon kusog; kag tungod sa imo kaayo ginadugangan mo ang amon ikasarang.

¹⁸Ginoo, Balaan nga Dios sang Israel, ikaw ang nagapanag-iya sang amon hari nga nagaprotektar sa amon.

¹⁹Sang una nagpakighambal ka sa imo matutom nga mga alagad paagi sa palanan-awon. Siling mo, “Ginbuligan ko ang isa ka soldado. Ginpili ko siya halin sa akon katawhan agod mangin hari.

²⁰Si David, nga akon alagad, amo ang akon ginpili nga hari paagi sa paghaplas sa iya sang akon balaan nga lana.

²¹Ang akon gahom magaupod sa iya kag magapabaskog sa iya.

²²Indi makadaog-daog sa iya ang iya mga kaaway; indi makapigos sa iya ang mga malaot.

²³Samtang nagatulok siya dugmukon ko ang iya mga kaaway hasta nga magkalamatay sila.

²⁴Higugmaon ko siya kag unungan. Kag paagi sa akon gahom dugangan ko ang iya ikasarang.

²⁵Pagahumon ko siya halin sa Dagat sang Mediteraneo hasta sa Suba sang Eufrates.

²⁶Magasiling siya sa akon, ‘Ikaw ang akon Amay kag Dios; ikaw ang palalipdan nga bato nga nagaluwas sa akon.’

²⁷Kabigon ko siya nga akon kamagulangan nga anak, ang labing gamhanan sa tanan nga hari.

²⁸Padayunon ko ang akon gugma sa iya hasta san-o, kag ang akon kasugtanan sa iya indi gid magpalyar.

²⁹Ang tagsa ka hari sang Israel magahalin sa iya mga kaliwat hasta san-o; ang iya ginharian magadugay pareho kadugay sang langit.

³⁰Pero kon ang iya mga kaliwat indi magtuman sang akon kasuguan, mga pagsulundan, kag mga pagpanudlo,

³¹

³²silutan ko sila sing masakit tungod sang ila mga sala.

³³Pero higugmaon kag unungan ko gihapon si David.

³⁴Indi ko pagdulaon ang akon kasugtanan sa iya, kag indi ko pagliwaton ang akon ginpromisa sa iya.

³⁵Sa akon balaan nga ngalan, nagpromisa ako sing makaisa nga indi gid ako magbutig sa kay David.

³⁶Ang tagsa ka hari sang Israel magahalin sa iya mga kaliwat hasta san-o. Ang iya ginharian magadugay sa akon panulok pareho kadugay sang adlaw;

³⁷magapadayon ini hasta san-o pareho sang bulan nga ginakabig nga masaligan nga manugpamatuod sa langit.”

³⁸Pero, Ginoo, naakig ka sa imo pinili nga hari; gintalikdan mo siya kag ginsikway.

³⁹Gindula mo ang imo kasugtanan sa iya nga imo alagad, kag ginkuha mo ang iya awtoridad bilang hari.

⁴⁰Ginrumpag mo ang mga pader sang iya siyudad. Gin-guba mo ang iya napaderan nga mga siyudad.

⁴¹Ang mga pagkabutang sang iya siyudad ginpanguha sang tanan nga nagaagi. Ginpakahuy-an siya sang iya katupad nga mga nasyon.

⁴²Ginpadaog mo ang iya mga kaaway; ginlipay mo sila tanan.

⁴³Ginhimo mo nga wala sing pulos ang iya mga armas kag ginpapierdi mo siya sa inaway.

⁴⁴Ginkuha mo ang iya pagkagamhanan kag ang iya awtoridad bilang hari.

⁴⁵Daw sa nagtigulang siya bisan bataon pa siya; kag ginpakahuy-an mo siya.

⁴⁶Hasta san-o pa bala, Ginoo, nga magpanago ka? Hasta bala sa wala sing katapusan? Hasta san-o pa bala ang imo kaakig nga daw sa kalayo?

⁴⁷Dumduma bala kon daw ano kalip-ot sang kabuhi sang tawo; dumduma nga ginhimo mo ang tawo nga may kamatayon.

⁴⁸Sin-o bala ang tawo nga indi mapatay? Makalikaw bala ang tawo sa kamatayon?

⁴⁹Ginoo, diin na bala ang imo gugma nga pareho sang una, nga ginpromisa mo kay David sa imo katutom sa iya?

⁵⁰Dumduma, Ginoo, ang pagpakahuya sang madamo nga mga nasyon sa imo mga alagad, nga ginaagwanta ko lang.

⁵¹Sila nga imo mga kaaway, Ginoo, amo ang nagayaguta sang imo pinili nga hari bisan diin siya magkadto.

⁵²Dalayawon ang Ginoo sa wala sing katapusan! Amen! Amen!