Read Hiligaynon Psalms 9 Bible Online

Psalms 9 - Hiligaynon bible

Psalms 9

¹Nagahukom ang Dios sing Husto Pasalamatan ko ikaw, Ginoo, sa bug-os ko nga tagipusuon. Isugid ko ang tanan mo nga makatilingala nga mga binuhatan.

²Labing Mataas nga Dios, magakalipay gid ako kag magakanta sang mga pagdayaw tungod sa imo.

³Kon atubangon mo na ang akon mga kaaway, magapalagyo sila nga nagakalatumba, kag magakalamatay sila.

⁴Kay matarong ka nga manughukom nga nagapungko sa imo trono; ginhukman mo ako kag napamatud-an mo nga wala ako sing sala.

⁵Ginsentensyahan mo kag ginlaglag ang malaot nga mga nasyon gani indi na gid sila madumduman hasta san-o.

⁶Ginlaglag mo sing bug-os ang akon mga kaaway, kag indi na gid sila makita hasta san-o. Ginpangguba mo ang ila mga siyudad, kag indi na gid sila madumduman pa.

⁷Pero ikaw, Ginoo, nagahari sa wala sing katapusan; handa na ang imo trono sa paghukom.

⁸Pagahukman mo sing husto ang mga tawo sa kalibutan, nga wala ka sing may pinilian.

⁹Ginoo, ikaw ang dalangpan sang mga ginapigos sa tion sang kalisod.

¹⁰Nagasalig sa imo ang mga tawo nga nakakilala sa imo. Kay sila nga mga nagadangop sa imo wala mo ginasikway.

¹¹Kantahi ninyo sang mga pagdayaw ang Ginoo nga nagahari sa Zion! Ibantala ninyo sa mga nasyon ang iya mga binuhatan!

¹²Wala niya ginakalimtan ang pagpanawag sang mga kubos, kay ginabalusan niya ang mga nagapigos sa ila.

¹³Ginoo, tan-awa kon ano ang pagpigos sa akon sang akon mga kaaway. Kaluoyi ako kag luwasa sa kamatayon,

¹⁴agod masugid ko sa mga tawo didto sa mga puwertahan sang Zion ang imo mga binuhatan, nga nangin kabangdanan nga ginadayaw ko ikaw. Magakalipay ako didto tungod kay ginluwas mo ako.

¹⁵Natabo mismo sa mga nasyon ang ila ginplano nga malain. Pareho lang nga nahulog sila sa buho nga ila ginkutkot ukon nasiod sila sa siod nga ila ginbutang.

¹⁶Nagpakilala ang Ginoo kon sin-o gid siya paagi sa iya matarong nga paghukom, kag sila mismo nga malaot nga mga tawo ang nahalitan sang ila malaot nga mga ginahimo.

¹⁷Mapatay ang malaot nga mga tawo sa tanan nga nasyon, kay ginasikway nila ang Dios.

¹⁸Indi hasta san-o pabay-an sang Dios ang mga imol. May paglaom gihapon ang mga kubos nga luwason sila sang Dios.

¹⁹Sige na Ginoo, indi pagtuguti nga mangibabaw ang ikasarang sang mga tawo. Hukmi ang mga nasyon sa imo presensya.

²⁰Pahadluka sila Ginoo, kag ipareyalisar sa ila nga mga tawo lamang sila.