Read Hiligaynon Psalms 90 Bible Online

Psalms 90 - Hiligaynon bible

Psalms 90

¹Ang Dios kag ang Tawo Ginoo, ikaw ang amon puluy-an halin pa sang una.

²Sa wala mo pa matuga ang mga bukid kag ang kalibutan, ikaw na ang Dios, kag ikaw gihapon ang Dios sa wala sing katapusan.

³Ikaw ang nagabuot sa kamatayon sang tawo; ginabalik mo siya sa duta nga amo ang iya ginhalinan.

⁴Ang isa ka libo ka tuig sa amon daw isa lang ka adlaw sa imo nga nagligad na, ukon daw malip-ot lang nga oras sa kagab-ihon.

⁵Ginabutangan mo sang katapusan ang amon kabuhi pareho sa damgo

⁶ukon pareho sa hilamon nga nagaulhot kag nagatubo kon aga, pero pagkahapon nagakalaya kag nagakapatay.

⁷Ang imo kaakig sa amon, nagapahadlok kag nagalaglag sa amon.

⁸Nakita mo ang amon mga sala. Bisan ang mga sala nga nahimo namon sa tago hayag sa imo presensya.

⁹Matuod nga sa imo kaakig mapatay kami; matapos ang amon kabuhi sa daw isa lang ka panghayhay.

¹⁰Ang kalawigon sang amon kabuhi 70 ka tuig, ukon 80 ka tuig kon mabakod kami. Pero bisan pa ang pinakamaayo namon nga mga tinuig madamo sang mga kagamo kag kalisod. Matuod gid man nga sa indi madugay matapos ang amon kabuhi kag madula kami.

¹¹Wala sing may nakaeksperiensya sang imo bug-os nga kaakig. Kag samtang nagadugang ang amon ihibalo sa imo kaakig nagadugang man ang amon pagtahod sa imo.

¹²Paintiendiha kami nga kalip-ot lang sang amon kabuhi, agod mangin mainalamon kami sa amon pagkabuhi.

¹³Ginoo, hasta san-o pa bala ang imo kaakig sa amon? Talupangda kag kaluoyi kami nga imo mga alagad.

¹⁴Kada aga ipakita ang imo gugma sa amon agod magkanta kami sa kalipay kag mangin malipayon kami sa bug-os namon nga kabuhi.

¹⁵Hatagi kami sang kalipay nga pareho kalawig sa mga tinuig nga ginsilutan mo kami kag nag-antos kami.

¹⁶Ipakita sa amon nga imo mga alagad, kag sa amon mga kaliwat, ang imo makatilingala nga binuhatan kag ang imo pagkagamhanan.

¹⁷Ginoo nga amon Dios, kabay pa nga pakamaayuhon mo kami kag hatagan sang kadalag-an sa tanan namon nga mga ginahimo.