Read Hiligaynon Psalms 91 Bible Online

Psalms 91 - Hiligaynon bible

Psalms 91

¹Ang Dios Aton nga Manugprotektar Ang bisan sin-o nga magpaprotektar sa Labing Mataas nga Dios nga Makagagahom protektaran niya.

²Makasiling siya sa Ginoo, “Ikaw ang akon dalangpan kag mabakod nga palanaguan. Ikaw ang akon Dios nga akon ginasaligan.”

³Sigurado gid nga ilikaw ka niya sa mga siod kag sa makamamatay nga mga balatian.

⁴Protektaran ka niya pareho sang pagprotektar sang pispis sa iya mga buto sa idalom sang iya mga pakpak. Sa iya katutom, protektaran ka niya kag apinan.

⁵Indi ka dapat mahadlok sa mga kalahadlukan, sa mga kaaway, sa mga balatian, kag sa mga kalalat-an nga nagaabot kon gab-i ukon adlaw.

⁷Bisan linibo ka mga tawo ang magkalamatay sa imo palibot, indi ka maano.

⁸Makita mo lang kon paano ginasilutan ang malaot nga mga tawo.

⁹Tungod kay ginhimo mo nga dalangpan ang Ginoo, ang Labing Mataas nga Dios nga akon manugprotektar,

¹⁰wala sing kalamidad ukon kalalat-an nga magaabot sa imo ukon sa imo panimalay.

¹¹Kay suguon sang Dios ang iya mga anghel sa pagbantay sa imo bisan diin ka makadto.

¹²Hakwaton ka nila agod indi mapilas ang imo tiil sa bato.

¹³Tapakon mo ang mga leon kag ang dalitan nga mga man-og.

¹⁴Nagsiling ang Dios, “Luwason ko kag protektaran ang nagahigugma kag nagakilala sa akon.

¹⁵Kon magpanawag siya sa akon, sabton ko siya; kon ara siya sa kalisod, updan ko siya; luwason ko siya kag padunggan.

¹⁶Hatagan ko siya sang malawig nga kabuhi, kag ipakita ko sa iya ang akon pagluwas sa iya.”