Read Hiligaynon Psalms 92 Bible Online

Psalms 92 - Hiligaynon bible

Psalms 92

¹Kanta sa Pagdayaw sa Dios Ginoo nga Labing Mataas nga Dios, maayo gid ang magpasalamat kag magkanta sang mga pagdayaw sa imo.

²Maayo gid ang magsugid sang imo gugma kag katutom adlaw-gab-i,

³nga ginatukaran sang mga instrumento nga may mga kuwerdas.

⁴Kay ginlipay mo ako, Ginoo, paagi sa imo makatilingala nga mga binuhatan. Tungod sang imo mga ginhimo nagakanta ako sa kalipay.

⁵Daw ano ka gamhanan ang imo mga ginhimo, Ginoo! Indi namon matungkad ang imo hunahuna.

⁶Indi maintiendihan sang mga buang-buang ukon sang mga balingag

⁷nga bisan mag-uswag ang mga malaot pareho sa hilamon nga nagatubo, laglagon sila sa wala sing katapusan.

⁸Pero ikaw, Ginoo, labaw sa tanan sa wala sing katapusan.

⁹Sigurado gid nga ang tanan mo nga malaot nga mga kaaway magalalapta kag magakalamatay.

¹⁰Ginhatagan mo ako sang kusog pareho sa kusog sang turo nga baka, kag ginhatagan mo ako sang kalipay.

¹¹Nabatian ko kag nakita mismo ang pagkapierdi sang akon malaot nga mga kaaway.

¹²Ang mga matarong magauswag pareho sa mga palma nga nagalambo, kag magabakod sila pareho sa mga kahoy nga sedro sang Lebanon.

¹³Pareho sila sa mga kahoy nga gintanom sa templo sang Ginoo nga aton Dios, nga nagalambo

¹⁴kag nagapamunga gihapon bisan tigulang na, kag padayon nga malagtom kag mabakod.

¹⁵Nagapakita lang ini nga matarong ang Ginoo nga akon palalipdan nga bato; wala gid sing kalautan sa iya.