Read Hiligaynon Psalms 94 Bible Online

Psalms 94 - Hiligaynon bible

Psalms 94

¹Ang Dios amo ang Manughukom sang Tanan Ginoo, Dios ikaw nga nagatimalos; ipakita na ang imo kaakig.

²Ikaw ang nagahukom sa tanan nga tawo; gani, sige na, balusi ang mga bugalon sang nagakabagay sa ila.

³Hasta san-o pa bala ang pagkinasadya sang mga malaot, Ginoo?

⁴Sila tanan nga nagahimo sang malain puwerte magpahambog.

⁵Ginapigos nila ang katawhan nga imo ginapanag-iyahan.

⁶Ginapamatay nila ang mga balo nga babayi, ang mga ilo, kag ang mga dumuluong.

⁷Nagasiling sila, “Indi makakita ang Ginoo sa aton mga ginahimo; ang Dios ni Jacob wala nagasapak.”

⁸Kamo nga mga balingag kag buang-buang nga mga tawo, san-o pa bala kamo makaintiendi? Abi intiendiha ninyo ini:

⁹Ang Dios nga naghimo sang aton mga dulunggan kag mga mata, indi bala siya makabati kag makakita sa aton?

¹⁰Siya nga nagadisiplina sa mga nasyon, indi bala siya magsilot? Siya nga nagatudlo sa mga tawo, indi bala siya makahibalo?

¹¹Nahibaluan sang Ginoo nga ang mga ginahunahuna sang mga tawo wala sing pulos.

¹²Ginoo, bulahan ang tawo nga ginadisiplina mo paagi sa pagtudlo sa iya sang imo kasuguan.

¹³Ginatudluan mo siya agod nga may kalinong siya sa tion sang kagamo hasta sa tion nga silutan mo ang mga malaot.

¹⁴Kay indi mo gid pagsikwayon, Ginoo, ang katawhan nga imo ginapanag-iyahan.

¹⁵Sigurado nga matabo liwat nga ang mga paghukom matarong, kag suportaran ini sang tanan nga tawo nga nagakabuhi sing husto.

¹⁶Wala sing iban nga nagabulig sa akon batok sa malaot nga mga tawo kundi ikaw lang gid, Ginoo.

¹⁷Kon wala mo ako ginabuligan siguro patay na ako subong.

¹⁸Sang nagsiling ako sa imo, Ginoo, nga daw mapatay na ako, ginbuligan mo ako sang imo gugma.

¹⁹Sang nagakabalaka ako, ginpabakod mo ako kag nalipay ako.

²⁰Indi puwede nga kadampig ka sang malaot nga mga manughukom, nga nagahimo sang malain paagi sa kasuguan.

²¹Nagaisa sila sa pagkontra sa mga matarong kag ginasentensyahan nila sang kamatayon ang mga wala sing sala.

²²Pero ikaw, Ginoo nga akon Dios, amo ang akon dalangpan kag palalipdan nga bato.

²³Silutan mo sila kag laglagon tungod sang ila mga sala. Laglagon mo gid sila, Ginoo nga amon Dios.