Read Hiligaynon Psalms 96 Bible Online

Psalms 96 - Hiligaynon bible

Psalms 96

¹Ang Dios ang Pinakagamhanan nga Hari (1 Cro. 16:23-33) Kamo nga mga katawhan sa bug-os nga kalibutan, magkanta kamo sang bag-o nga kanta sa Ginoo!

²Magkanta kamo sa Ginoo kag dayawa ninyo siya. Isugid ninyo adlaw-adlaw ang parte sa pagluwas niya sa aton.

³Ibantala ninyo sa tanan nga katawhan sang mga nasyon ang iya pagkagamhanan kag ang iya makatilingala nga mga binuhatan.

⁴Kay gamhanan ang Ginoo, kag takos gid nga dayawon. Dapat siya nga tahuron labaw sa tanan nga dios,

⁵kay ang tanan nga dios sang iban nga mga nasyon ginhimo man lang nila agod ila simbahon, pero ang Ginoo amo ang naghimo sang kalangitan.

⁶Ara sa iya ang pagkagamhanan kag pagkahalangdon; ang kusog kag katahom ara sa iya nga templo.

⁷Dayawa ninyo ang Ginoo, kamo nga mga katawhan sang mga nasyon. Dayawa ninyo ang iya gahom kag kusog.

⁸Dayawa ninyo ang iya pagkagamhanan kag magdala kamo sang halad sa inyo pagsulod sa iya templo.

⁹Simbaha ninyo siya sa iya balaan nga presensya. Magtahod kamo sa iya presensya, kamo nga mga katawhan sa bug-os nga kalibutan.

¹⁰Sugiri ninyo ang mga nasyon nga, “Nagahari ang Ginoo.” Ginpahamtang niya sing malig-on ang kalibutan kag indi ini mauyog. Pagahukman niya ang mga tawo nga wala sing may pinilian.

¹¹Magkalipay ang kalangitan kag ang kalibutan, pati na ang kadagatan, mga latagon, kag ang tanan nga ara sa ila. Ang tanan nga kahoy sa kagulangan magakanta sa kalipay

¹³sa presensya sang Ginoo. Kay sigurado nga magaabot siya sa paghukom sa mga tawo sa kalibutan. Pagahukman niya sila nga may pagkamatarong kag suno sa iya kamatuoran.