Read Hiligaynon Psalms 97 Bible Online

Psalms 97 - Hiligaynon bible

Psalms 97

¹Ang Dios Labaw sa Tanan nga Pangulo Nagahari ang Ginoo! Gani magkalipay ang kalibutan, pati na ang mga isla.

²Ginalibutan siya sang madamol nga gal-om, kag nagahari siya nga may pagkamatarong kag hustisya.

³Nagauna sa iya ang kalayo nga nagasunog sa iya mga kaaway sa palibot.

⁴Ang iya kilat nagapasanag sa kalibutan. Pagkakita sini sang mga tawo nagakulurog sila sa kahadlok.

⁵Nagakalatunaw ang mga bukid pareho sa kandila sa presensya sang Ginoo, ang Ginoo nga nagagahom sa bug-os nga kalibutan.

⁶Nagapahayag ang kalangitan nga matarong siya, kag ang tanan nga katawhan nakakita sang iya pagkagamhanan.

⁷Nagakahuy-an ang tanan nga nagasimba sa mga imahen kag nagapabugal sa sina nga mga dios-dios. Ang tanan nga dios nagaluhod sa pagsimba sa Dios.

⁸Ginoo, nabatian sang mga pumuluyo sang Zion kag sang iban pa nga mga banwa sang Juda nga silutan mo ang ila mga kaaway, gani nagakalipay sila.

⁹Kay ikaw, Ginoo, nga Labing Mataas nga Dios, nagagahom sa bug-os nga kalibutan. Mas labaw ka sang sa tanan nga dios.

¹⁰Ang mga nagahigugma sa Ginoo dapat nga magkaugot sa malain. Kay ginatipigan sang Ginoo ang kabuhi sang iya matutom nga katawhan kag ginaluwas niya sila sa kamot sang mga malaot.

¹¹Ang kaayo sang Dios daw sa adlaw nga nagasilak sa mga matarong kag nagahatag ini sang kalipay sa ila.

¹²Kamo nga mga matarong, magkalipay kamo tungod sang ginhimo sang Ginoo sa inyo. Dayawa ninyo siya bilang pagdumdom kon ano siya ka balaan.