Read Hiligaynon Psalms 99 Bible Online

Psalms 99 - Hiligaynon bible

Psalms 99

¹Ang Dios Balaan nga Hari Nagahari ang Ginoo kag nagapungko sa tunga sang mga kerubin. Gani nagakurog ang mga tawo sa pagtahod sa iya kag nagatay-og ang kalibutan.

²Gamhanan ang Ginoo sa Zion; nagagahom siya sa tanan nga katawhan.

³Magadayaw ang mga tawo sa iya tungod kay gamhanan kag makatilingala siya. Balaan siya!

⁴Gamhanan siya nga Hari, kag luyag niya ang hustisya. Wala siya sing may pinilian sa iya paghukom kag matarong kag husto ang iya ginahimo sa Israel.

⁵Dayawa ang Ginoo nga aton Dios. Simbaha siya sa iya templo. Balaan siya!

⁶Si Moises kag si Aaron ang duha sa iya mga pari, kag si Samuel ang isa sa mga nagpangamuyo sa iya. Nagpanawag sila sa iya kag ginsabat niya sila.

⁷Nagpakighambal siya sa ila halin sa madamol nga panganod; gintuman nila ang mga pagpanudlo kag mga pagsulundan nga ginhatag niya sa ila.

⁸Ginoo nga amon Dios, ginsabat mo ang mga pangamuyo sang imo katawhan. Ginpakita mo sa ila nga mapinatawaron ka nga Dios bisan ginsilutan mo sila sa ila mga sala.

⁹Dayawa ang Ginoo nga aton Dios. Simbaha siya sa iya balaan nga bukid, kay balaan ang Ginoo nga aton Dios.