Read Hiligaynon Proverbs 1 Bible Online

Proverbs 1 - Hiligaynon bible

Proverbs 1

¹Ang Kapuslanan sang mga Hulubaton Amo ini ang mga hulubaton ni Solomon, nga anak ni David kag hari sang Israel.

²Paagi sa sini nga mga hulubaton, matun-an mo ang parte sa kaalam kag pagtadlong sa imo pamatasan, kag maintiendihan mo ang mga pulong nga nagahatag sang kaalam.

³Makapatadlong ini sa imo pamatasan agod mangin maalamon ka, nga nagakabuhi sing husto, matarong, kag nagakabagay.

⁴Makahatag ini sang kaalam sa mga wala sing alam, kag makahatag ini sang ihibalo sa mga pamatan-on kon paano magdesisyon sing husto.

⁵Paagi sa pagpamati sini, madugangan pa gid ang kaalam sang mga maalamon kag matuytuyan ang mga may tinun-an,

⁶agod maintiendihan nila ang kahulugan sang mga hulubaton, mga paanggid, kag mga paktakon sang mga maalamon.

⁷Kon ang isa ka tawo gusto nga magmaalamon dapat magtahod siya sa Ginoo. Ang tawo nga buang-buang indi gusto sang kaalam kag indi niya gusto nga matadlong ang iya pamatasan.

⁸Laygay sa Paglikaw sa Malaot nga mga Tawo Anak, pamatii ang mga pagtadlong sang imo ginikanan sa imo pamatasan,

⁹kay makapaayo ina sa imo pamatasan pareho sa korokorona nga mga bulak ukon kulintas nga makapaayo sa imo hitsura kag makahatag sa imo sang kadungganan.

¹⁰Anak, indi ka magpadala-dala sa mga pagsulay sang makasasala nga mga tawo

¹¹ukon mag-upod sa ila kon magsiling sila nga, “Dali, upod ka sa amon; mamangga kita sang mga inosente nga tawo kag patyon naton sila.

¹²Buhi sila subong kag maayo ang lawas pero tudason ta sila; mangin pareho sila sa mga nagkaladto na sa lugar sang mga patay.

¹³Makakuha kita sa ila sang malahalon nga mga pagkabutang, kag pun-on ta ang aton mga balay sang aton mga inagaw.

¹⁴Sige na, upod sa amon, kay partidahon ta dayon ang aton mga inagaw.”

¹⁵Anak, indi ka gid mag-upod sa ila; maglikaw ka sa ila.

¹⁶Kay maabtik sila magpakasala kag magpatay sang tawo.

¹⁷Wala sing pulos ang pagbutang sang siod kon ang pispis nga imo dalakpon nagatan-aw.

¹⁸Nakahibalo ang pispis nga masiod siya, pero ining malaot nga mga tawo wala nakahibalo nga sila mismo ang mabiktima sa ila nga pagpamangga sa iban. Nagahulat sila sa pagpatay pero sila mismo ang mapatay.

¹⁹Amo ina ang dangatan sang mga tawo nga nagaangkon sang pagkabutang sa malain nga paagi. Mapatay sila sa sina nga buluhaton.

²⁰Resulta sang Pagsikway sang Kaalam Ang kaalam pareho sa tawo nga nagawali sing mabaskog sa mga karsada, mga plasa, mga merkado, kag sa mga puwertahan sang mga siyudad. Nagasiling siya,

²²“Kamo nga mga wala sing alam, hasta san-o pa bala kamo nga magpabilin nga pareho sina? Kamo nga mga nagapangyaguta, hasta san-o pa bala nga indi kamo nga magkalipay sa pagpangyaguta? Kamo nga mga buang-buang, hasta san-o pa bala kamo nga indi magkagusto sa kaalam?

²³Magpamati kamo sa akon pagsabdong sa inyo. Karon, isugid ko sa inyo ang akon ginahunahuna; ipahibalo ko sa inyo ang akon inughambal batok sa inyo:

²⁴Tungod nga wala kamo magsapak sang pagtawag ko sa inyo nga magpalapit kamo sa akon,

²⁵kag tungod nga ginbaliwala ninyo ang tanan ko nga mga laygay kag pagsabdong sa inyo,

²⁶kadlawan ko kamo kon mag-abot sa inyo ang kalaglagan nga daw sa buhawi; yagutaon ko kamo kon mag-abot sa inyo ang kalisod kag ang makahaladlok nga mga hitabo nga daw sa bagyo.

²⁸Dayon magapanawag kamo sa akon, pero indi ko kamo pagsabton. Pangitaon ninyo ako, pero indi ninyo ako makita.

²⁹Kay indi kamo gusto tudluan kag wala ninyo ginpili ang pagtahod sa Ginoo.

³⁰Ginabaliwala ninyo ang akon mga laygay kag ginapakalain ninyo ang akon pagsabdong sa inyo.

³¹Gani pagaanihon ninyo ang bunga sang inyo mga ginahimo kag ginaplano nga malain.

³²Kay ang pagkamalinapason sang mga wala sing alam magapatay sa ila, kag ang pagpatawhay-tawhay sang mga buang-buang magalaglag sa ila.

³³Pero ang nagapamati sa akon magakabuhi nga luwas sa katalagman. Indi siya maano kag wala siya sing kahadlukan.”