Read Hiligaynon Proverbs 6 Bible Online

Proverbs 6 - Hiligaynon bible

Proverbs 6

¹Dugang pa nga mga Pagpaandam Anak, kon nagpromisa ka nga ikaw ang mabayad sang utang sang iban,

²nasiod ka sa imo promisa,

³kag may obligasyon ka sa iban. Pero amo ini ang himua nga mahilway ka sa imo obligasyon sa iya: Kadtui siya kag magpakitluoy ka nga hilwayon ka niya sa imo obligasyon.

⁴Indi pagtulugi ukon pagpahuwayi

⁵hasta nga mahilway ka, pareho sa pispis ukon usa nga nakapalagyo sa mangangayam.

⁶Kamo nga mga matamad, tan-awa ninyo kag tun-i kon paano magkabuhi ang mga subay, agod mangin maalamon kamo.

⁷Bisan wala sing pangulo ukon manugdumala nga nagasugo sa ila,

⁸nagatipon sila sang ila pagkaon kon tig-ilinit kag kon tig-alani, agod may pagkaon sila kon tig-ululan.

⁹Kamo nga mga matamad magsagi na lang bala kamo katulog? San-o pa bala kamo magbugtaw?

¹⁰Pahuway-huway kag piyong-piyong pa kamo gamay

¹¹kag magaabot gulpi sa inyo ang kinawad-on nga pareho sa armado nga tulisan.

¹²Ang wala sing pulos kag malaot nga mga tawo nagapanugidsugid sing kabutigan.

¹³Nagapangilay pa sila kag nagasinyas paagi sa ila kamot kag tiil sa pagdaya sa iban.

¹⁴Sa ila nga pagkadayaon, permi sila nagaplano sa paghimo sang malain, kag nagapaumpisa sila sang gamo.

¹⁵Gani sa hinali lang laglagon sila, kag indi na gid sila matabangan.

¹⁶May anom ukon pito ka klase sang tawo nga ginakaugtan kag ginakangil-aran sang Ginoo:

¹⁷ang mga bugalon, ang mga butigon, ang mga nagapamatay sang tawo,

¹⁸ang mga nagaplano sing malain, ang mga maabtik maghimo sing malain,

¹⁹ang mga nagasaksi sing butig, kag ang mga nagapaaway sang iya kapareho.

²⁰Anak, sunda ang mga ginasugo kag ginatudlo sang imo ginikanan sa imo.

²¹Itanom ini sa imo hunahuna agod indi mo gid malimtan.

²²Ini magatuytoy, magatipig, kag magapadumdom sa imo pagkabuhi, bisan ano man ang imo ginahimo.

²³Kay ining ila mga ginasugo kag ginatudlo pareho sa suga nga magapasanag sa imo. Kag ang pagsaway nila sa imo, sa pagtadlong sang imo pamatasan, makapaayo kag makapalawig sang imo kabuhi.

²⁴Makapahilayo man ini sa imo sa malain nga babayi nga makagalanyat kon maghambal.

²⁵Indi ka magpatintar sa iya katahom. Indi ka magpadala-dala sa iya pagpangilay.

²⁶Ang pagpakighilawas sa babayi nga nagabaligya sang iya lawas puwede mabayaran sa bili sang tinapay, pero ang pagpakighilawas sa asawa sang iban bayaran mo sang imo mismo kabuhi.

²⁷Kon ipalapit mo ang kalayo sa imo dughan masunog ang imo bayo.

²⁸Kon maglakat ka sa baga mapaso ang imo tiil.

²⁹Gani kon magpakighilawas ka sa asawa sang iban magaantos ka.

³⁰Masami wala ginapakalain ang kawatan nga nagapangawat tungod kay gutom siya.

³¹Pero kon madakpan siya, pabayaron siya sing pito ka pilo sang iya ginkawat, kag maubos ang tanan niya nga pagkabutang.

³²Ang tawo nga nagapakigrelasyon sa asawa sang iban wala sing pag-intiendi. Ginaguba lang niya ang iya kaugalingon.

³³Pagasakiton siya, kag mahuy-an siya hasta san-o.

³⁴Kay ang bana nga nagapangimon puwerte mangakig, kag magabalos siya nga wala sing luoy-luoy.

³⁵Indi siya magbaton sang bayad, bisan ano pa ini ka dako.