Read Hiligaynon Proverbs 8 Bible Online

Proverbs 8 - Hiligaynon bible

Proverbs 8

¹Ginadayaw ang Kaalam Ang kaalam kag pag-intiendi pareho sa tawo nga nagawali.

²Nagatindog siya sa mataas nga mga lugar sa kilid sang dalan, sa mga ginsang-an sang mga dalan,

³sa mga puwertahan sang siyudad, kag sa mga alagyan. Kag nagawali siya sing mabaskog,

⁴“Tanan kamo nga katawhan, nagapakighambal ako sa inyo.

⁵Kamo nga mga wala sing alam, magmaalam kamo. Kamo nga mga buang-buang, maghangop kamo.

⁶Pamati kamo sa akon ginahambal, kay mapuslanon ini kag husto.

⁷Matuod gid ang akon ginahambal kag ginakangil-aran ko ang maghambal sing malain.

⁸Matarong ang tanan ko nga ginahambal kag wala ako nagahambal sang binutig ukon dinaya.

⁹Maathag ini tanan kag wala sing sayop sa mga tawo nga may pag-intiendi.

¹⁰Palabiha ang kaalam kag ang pagtadlong ko sa imo pamatasan sang sa pilak kag bulawan.

¹¹Kay ang kaalam mas bilidhon pa sang sa malahalon nga mga bato kag wala gid sing bisan ano nga butang nga imo ginahandom nga makatupong sini.

¹²Ako, nga amo ang kaalam, nakahibalo magtimbang-timbang kon diin ang husto ukon indi, kag nahibaluan ko magdesisyon sing husto.

¹³Ang nagatahod sa Ginoo nagakaugot sa malaot. Ginakaugtan ko ang pagpabugal, ang pagpakamatinaas-taason, ang malaot nga pagginawi, kag ang pagbinutig.

¹⁴Maayo ako maglaygay kag may husto nga kaalam. May pag-intiendi ako kag gahom.

¹⁵Paagi sa akon makadumala ang mga hari, kag makahimo ang mga pangulo sang matarong nga mga kasuguan.

¹⁶Paagi sa akon makadumala ang mga manugdumala kag mga opisyal—ang tanan nga nagadumala sing matarong.

¹⁷Ginahigugma ko ang mga nagahigugma sa akon; ang mga nagapangita sa akon makakita sa akon.

¹⁸Makahatag ako sang manggad, dungog, kauswagan kag kadalag-an nga nagapadayon.

¹⁹Ang makuha sa akon mas bilidhon pa sang sa puro gid nga bulawan ukon pilak.

²⁰Ginasunod ko ang matarong kag husto.

²¹Ang nagahigugma sa akon hatagan ko sang manggad; pun-on ko ang ginataguan nila sang manggad.

²²Sang una pa nga daan kaupod na ako sang Ginoo antes niya gintuga ang tanan.

²³Ginbuot niya nga ara na ako halin pa sang una. Ara na ako sang wala pa ang kalibutan: ang dagat, ang mga tuburan, ang mga bukid, ang mga kaumahan, kag bisan pa ang mga yab-ok.

²⁷Ara na ako sang pagtuga niya sang langit, sang pagbutang niya sang daw tinabuan sang langit kag sang duta,

²⁸sang pagtuga niya sang mga panganod, sang pagpatubod niya sang mga tuburan sa kadadalman,

²⁹sang pagbutang niya sang dulunan sang dagat agod indi ini maglapaw, kag sang pagbutang niya sang mga pundasyon sang kalibutan.

³⁰Pareho ako sa isa ka arkitekto sa tupad sang Ginoo. Ako ang iya kalipayan adlaw-adlaw, kag malipayon ako permi sa iya presensya.

³¹Nagakalipay ako sa kalibutan nga iya gintuga kag sa mga katawhan.

³²Gani karon mga anak, pamatii ninyo ako, kay bulahan ang mga nagasunod sa akon mga ginasiling.

³³Pamatii ninyo ang mga pagtadlong ko sa inyo pamatasan agod mangin maalamon kamo; kag indi gid ninyo ini pagkalimti.

³⁴Bulahan ang tawo nga permi nagabantay kag nagahulat sa pagpamati sa akon.

³⁵Kay ang tawo nga nagapangita sa akon makaangkon sang maayo kag malawig nga kabuhi, kag pakamaayuhon siya sang Ginoo.

³⁶Pero ang tawo nga wala nagapangita sa akon, ginahalitan lang niya ang iya kaugalingon. Ang mga akig sa akon naluyag sang kamatayon.”