Read Hiligaynon Isaiah 12 Bible Online

Isaiah 12 - Hiligaynon bible

Isaiah 12

¹Kanta sa Pagpasalamat Pag-abot sang sina nga adlaw, magakanta kamo: “Ginoo, ginadayaw ko ikaw. Naakig ka sa akon, pero karon nadula na ang imo kaakig, kag ginalipay mo ako.

²Ikaw, O Dios, amo ang akon manluluwas. Magasalig ako sa imo kag indi magkahadlok. Ikaw, Ginoo, amo ang nagahatag sa akon sang kusog, kag ikaw ang akon ginakanta. Ikaw ang nagluwas sa akon.”

³Subong nga ang mabugnaw nga tubig nagahatag kalipay sa ginauhaw, magakalipay kamo kon luwason na kamo sang Ginoo.

⁴Pag-abot sang sina nga adlaw, magakanta kamo: “Dayawa ninyo ang Ginoo! Simbaha ninyo siya! Isugid sa mga katawhan ang iya mga binuhatan. Ipanugid ninyo nga dalayawon siya.

⁵Kantahi ninyo ang Ginoo tungod kay makatilingala ang iya mga ginhimo. Ipahibalo ninyo ini sa bug-os nga kalibutan.

⁶Maghinugyaw kamo kag magkanta sa kalipay, kamo nga katawhan sang Jerusalem. Kay gamhanan ang Balaan nga Dios sang Israel nga inyo kaupod.”