Read Hiligaynon Isaiah 20 Bible Online

Isaiah 20 - Hiligaynon bible

Isaiah 20

¹Ang Mensahi Parte sa Egipto kag sa Etiopia Suno sa sugo ni Haring Sargon sang Asiria, ginsalakay sang kumander sang mga soldado sang Asiria ang Ashdod, kag gin-agaw ini.

²Antes ini natabo, nagsiling ang Ginoo kay Isaias nga anak ni Amoz, “Ubaha ang imo bayo nga sako pati ang imo sandalyas.” Gintuman ini ni Isaias, kag naglakat-lakat siya nga wala sing bayo kag nagatiniil.

³Sang ulihi nagsiling ang Ginoo, “Ang akon alagad nga si Isaias naglakat-lakat nga wala sing bayo kag nagatiniil sa sulod sang tatlo ka tuig. Ini isa ka simbolo nga nagapaandam sa Egipto kag sa Etiopia.

⁴Kay pagabihagon sang hari sang Asiria ang mga taga-Egipto kag taga-Etiopia, bata man ukon tigulang. Pagabihagon sila, nga wala sing bayo kag nagatiniil. Makita ang ila mga buli, kag mahuy-an gid ang Egipto.

⁵Ang mga nagasalig sa Etiopia kag nagapabugal sa Egipto matublag kag mahuy-an.

⁶Sa tion nga matabo ini, magasiling ang mga Filistinhon, ‘Tan-awa ang natabo sa mga nasyon nga ginsaligan naton kag ginpangayuan sang bulig sa pagluwas sa aton sa hari sang Asiria. Ti, paano na kita maluwas?’”