Read Hiligaynon Isaiah 4 Bible Online

Isaiah 4 - Hiligaynon bible

Isaiah 4

¹Sa sina nga tion, pito ka babayi ang magaagaway sa isa ka lalaki kag magasiling sila, “Kami na ang bahala sa amon pagkaon kag bayo, asawaha lang kami agod indi kami mahuy-an nga wala kami sing bana.”

²Pakamaayuhon Liwat ang Jerusalem Magaabot ang adlaw nga pabuganaon kag patahumon sang Ginoo ang mga tanom sa Israel, kag ang mga patubas sang duta mangin dungog kag kalipay sang mga nagkalabilin nga mga tawo sa Israel.

³Pagatawgon nga balaan ang mga tawo nga nagkalabilin nga buhi sa Zion, ang siyudad sang Jerusalem.

⁴Paagi sa iya nga gahom pagahukman kag limpyuhan niya ang kalautan sang mga babayi sa Jerusalem kag ang pagpamatay didto.

⁵Dayon magatuga ang Ginoo sang panganod nga magahandong sa Jerusalem kag sa mga nagatipon didto. Kag magatuga man siya sang nagadabadaba nga kalayo nga magapasanag kon gab-i. Magatabon ini sila sa Jerusalem pareho sa isa ka malapad nga tolda.

⁶Kag pareho ini sa payag-payag nga magahatag sang handong sa init sang adlaw kag palasilungan kon may bagyo kag ulan.