Read Hiligaynon Jonah 2 Bible Online

Jonah 2 - Hiligaynon bible

Jonah 2

¹Ang Pangamuyo ni Jonas Nagpangamuyo si Jonas sa Ginoo nga iya Dios sa sulod sang isda.

²Siling niya, “Nagpanawag ako sa imo, Ginoo, sa akon kalisod kag ginsabat mo ako. Nagpangayo ako sang bulig sa imo sa bibi sang kamatayon, kag ginpamatian mo ako.

³Gintagbong mo ako sa kadadalman sang dagat. Ginlikupan ako sang tubig kag gintabunan sang mga balod nga ginpadala mo.

⁴Gintabog mo ako sa imo presensya, pero nagalaom ako nga makapalapit liwat sa imo, didto sa imo balaan nga templo.

⁵Ginlapawan ako sang tubig kag daw malumos na gid ako. Gintabunan ako sang tubig kag ginsamburan ang akon ulo sang tanom sa dagat.

⁶Naglugdang ako hasta sa duta sang idalom sang dagat, daw pareho lang nga ginpriso ako sa kadadalman sang duta sa wala sing katapusan. Pero ginkuha mo ako sa sina nga kadadalman, O Ginoo nga akon Dios.

⁷Sang daw mapatay na gid ako, nagpanawag ako sa imo, Ginoo. Kag ginpamatian mo ang akon pangamuyo didto sa imo balaan nga templo.

⁸Ang mga tawo nga nagasimba sa mga dios-dios nga wala sing pulos nagasikway sang ila paghigugma sa imo.

⁹Pero ako iya magahalad sa imo nga nagakanta sang pagpasalamat. Tumanon ko ang ginpromisa ko nga maghalad sa imo. Ikaw, Ginoo, ang nagaluwas!”

¹⁰Karon, ginsugo sang Ginoo ang isda nga iluad si Jonas. Gani ginluad niya si Jonas sa baybayon.