Read Hiligaynon Numbers 34 Bible Online

Numbers 34 - Hiligaynon bible

Numbers 34

¹Ang Mga Dulunan sang Canaan Nagsiling ang Ginoo kay Moises,

²“Silinga ang mga Israelinhon nga kon magsulod na sila sa Canaan, amo ini ang dulunan sang duta nga ila palanublion:

³“Ang dulunan sa bagatnan amo ang kamingawan sang Zin, sa dulunan sang Edom. Magasugod ini sa bagatnan nga bahin sang Patay nga Dagat.

⁴Dayon magaliko ini pabagatnan pakadto sa Taklaran sang Akrabim, hasta sa kamingawan sang Zin, kag magapadayon sa bagatnan sang Kadesh Barnea. Dayon magaderetso ini sa Hazar Adar hasta sa Azmon,

⁵kag magaliko pakadto sa ililigan sang tubig sang Egipto, kag magatapos sa Dagat sang Mediteraneo.

⁶“Ang dulunan sa nakatundan amo ang Dagat sang Mediteraneo.

⁷“Ang dulunan sa aminhan magahalin sa Mediteraneo pakadto sa Bukid sang Hor,

⁸kag halin sa Bukid sang Hor pakadto sa Lebo Hamat. Magapadayon ini sa Zedad

⁹hasta sa Zifon kag magatapos sa Hazar Enan.

¹⁰“Ang dulunan sa sidlangan magahalin sa Hazar Enan pakadto sa Shefam.

¹¹Dayon magadulhog ini pakadto sa Ribla, sa sidlangan dampi sang Ain, kag magapadayon ini sa mga bulobukid sa sidlangan sang Dagat sang Galilea.

¹²Dayon magapadulhog ini sa Jordan kag magatapos sa Patay nga Dagat. “Amo ini ang inyo duta, kag ang iya mga dulunan sa palibot.”

¹³Dayon nagsiling si Moises sa mga Israelinhon, “Partidahon ninyo ini nga duta bilang palanublion ninyo paagi sa paggabot-gabot. Nagsiling ang Ginoo nga ihatag ini sa siyam kag tunga nga tribo,

¹⁴kay ang tribo ni Reuben, ni Gad, kag ang katunga sang tribo ni Manase nakabaton na sang ila palanublion sa sidlangan dampi sang Jordan malapit sa Jerico.”

¹⁶Nagsiling ang Ginoo kay Moises,

¹⁷“Si Eleazar nga pari kag si Josue nga anak ni Nun amo ang magapartida sang duta para sa mga tawo.

¹⁸Kag magpili ka sang isa ka pangulo sa kada tribo sa pagbulig sa ila sa pagpartida sang duta.

¹⁹Amo ini ang mga ngalan sang mga ginpili: Tribo Pangulo Juda Caleb nga anak ni Jefune Simeon Shemuel nga anak ni Amihud Benjamin Elidad nga anak ni Kislon Dan Buki nga anak ni Jogli Manase nga anak ni Jose Haniel nga anak ni Efod Efraim nga anak ni Jose Kemuel nga anak ni Shiftan Zebulun Elizafan nga anak ni Parnac Isacar Paltiel nga anak ni Azan Asher Ahihud nga anak ni Shelomi Naftali Pedahel nga anak ni Amihud”

²⁹Sila ang mga ginpili sang Ginoo sa pagbulig partida sang duta sang Canaan bilang palanublion sang mga Israelinhon.