Read Hiligaynon Hebrews 1 Bible Online

Hebrews 1 - Hiligaynon bible

Hebrews 1

¹Ang Pulong sang Dios Paagi sa Iya Anak Sang una nga panahon, madamo gid nga beses nga naghambal ang Dios sa aton mga katigulangan sa nagkalain-lain nga paagi, paagi sa mga propeta.

²Pero sa sining ulihi nga mga inadlaw, naghambal siya sa aton paagi sa iya Anak. Paagi sa iya, ginhimo sang Dios ang bug-os nga kalibutan, kag siya man ang iya ginpili nga mangin tag-iya sang tanan nga butang.

³Sa iya mismo makita ang gahom sang Dios nga nagasilak, kag kon ano ang Dios amo man siya. Siya amo ang nagabuot sang tanan nga butang sa bug-os nga kalibutan paagi sa iya makagagahom nga pulong. Pagkatapos nga nalimpyuhan niya kita sa aton mga sala, nagpungko siya sa tuo sang Makagagahom nga Dios didto sa langit.

⁴Mas Labaw ang Anak sang Dios sang sa mga Anghel Gani mas labaw ang Anak sang Dios kag mas halangdon ang iya ngalan sang sa mga anghel.

⁵Kay wala gid sing anghel nga ginsilingan sang Dios, “Ikaw ang akon Anak, kag subong ipakilala ko nga ako ang imo Amay.” Kag wala man nagsiling ang Dios parte sa bisan kay sin-o nga anghel, “Ako mangin iya Amay, kag siya mangin akon Anak.”

⁶Kag sang buot na ipadala sang Dios ang iya bugtong nga Anak diri sa kalibutan, nagsiling man siya, “Ang tanan nga anghel sang Dios dapat magsimba sa iya.”

⁷Amo ini ang ginsiling sang Dios parte sa mga anghel, “Ang mga anghel puwede ko nga himuon nga hangin. Ini sila nga akon mga suluguon puwede ko man nga himuon nga nagadabdab nga kalayo.”

⁸Pero kon parte sa iya Anak, nagsiling siya, “Ang imo ginharian, O Dios, wala gid sing katapusan, kag matarong ang imo pagdumala sa imo ginharian.

⁹Naluyag ka sa matarong, pero naugot ka sa malain. Gani ginpili ka sang Dios, nga imo Dios, kag ginhatagan sang kalipay nga labaw sang sa ginhatag niya sa imo mga kaupdanan.”

¹⁰Kag nagsiling pa gid siya sa iya Anak, “Sa ginsuguran ikaw, Ginoo, amo ang nagtuga sang kalibutan kag sang kalangitan.

¹¹Ini sila magakalawala, pero ikaw magapadayon sa gihapon. Ang tanan magagabok pareho sa bayo.

¹²Kag pareho man sa bayo, piuron mo ini tanan kag ilisan. Pero ikaw iya amo lang sa gihapon, wala nagatigulang kag wala sing kamatayon.”

¹³Halin pa sang una, wala gid sing anghel nga ginsilingan sang Dios, “Pungko diri sa akon tuo hasta mapaidalom ko sa imo ang imo mga kaaway.”

¹⁴Ti, indi bala ang mga anghel mga espiritu lang nga ginasugo sang Dios nga magbulig sa mga tawo nga magabaton sang kaluwasan?